اٹک تحریک انصاف کا قلعہ ہے اور قلعہ رہے گا، وزیر اعلی پنجاب 

تفصیلات کے مطابق وزیر اعلی پنجاب سے رکن قومی اسمبلی میجر (ر) طاہر صادق کی ملاقات ہوئی ہے۔وزیر اعلی پنجاب عثمان بزدار نے کہا کہ  اٹک کی تعمیر و ترقی کیلئے اربوں روپے کے منصوبوں پر کام جاری ہے۔ اٹک کو ماضی کی حکومت نے جان بوجھ کر نظر انداز کیا۔سابق حکومت کے دور میں اٹک کو ترقی کے سفر میں پیچھے رکھا گیا۔ تحریک انصاف کی حکومت نے اٹک کے عوام کو ان کا حق واپس کیا ہے۔

عثمان بزدار نے کہا کہ  اٹک تحریک انصاف کا قلعہ ہے اور قلعہ رہے گا۔جتنے ترقیاتی کام موجودہ دور میں اٹک میں ہوئے ہیں، تاریخ میں اس کی مثال نہیں ملتی۔ اٹک میں تعلیم، صحت اور دیگر شعبوں کیلئے ریکارڈ فنڈز مختص کئے گئے ہیں۔ا ٹک میں 200بیڈز کا مدر اینڈ چائلڈہسپتال بن رہا ہے۔ اس ہسپتال پر 5ارب32 کروڑروپے لاگت آئے گی۔

وزیر اعلی پنجاب کا کہنا تھا کہ  اٹک میں صحت کی سہولتو ں کی اپ گریڈیشن سے نہ صرف اٹک بلکہ خیبر پختونخوا کے 3ملحقہ اضلاع صوابی، نوشہرہ اور ہری پور کے عوام بھی مستفید ہو سکیں گے۔ اٹک میں ڈی ایچ کیو میں 100 بیڈ کا اضافہ کیا جا رہا ہے۔ پاکستان تحریک انصاف کی حکومت پنجاب کے ہر چھوٹے بڑے شہر کی یکساں ترقی پر یقین رکھتی ہے۔ ہم پنجاب کے تمام پسماندہ علاقوں کو ترقی یافتہ شہروں کے برابر لائیں گے۔ ڈسٹرکٹ ڈویلپمنٹ پیکیج کے تحت اٹک کے لئے 20ارب 60کروڑ روپے مختص کئے ہیں۔