فیصل واؤڈاکی تاحیات نااہلی کیخلاف درخواست قابل سماعت ہونے پر فیصلہ محفوظ

تفصیلات کے مطابق اسلام آباد ہائی کورٹ میں گزشتہ روز فیصل واؤڈا نے الیکشن کمیشن کی جانب سے تاحیات نااہلی کو چیلنج کیا ، ان کی درخواست پر آج چیف جسٹس اسلام آباد ہائی کورٹ جسٹس اطہر من اللّٰہ سماعت کررہے ہیں ۔  دوران سماعت عدالت نے استفسار کیا کہ فیصل واوڈا کے بیان حلفی جمع کرانےکی آخری تاریخ کیا تھی، جس پر فیصل واوڈا نے آگاہ کیا کہ انہوں نے 11 جون 2018 کوبیان حلفی جمع کرایا۔ چیف جسٹس اطہرمن اللہ نے کہا کہ حقائق بتائیں، الیکشن کمیشن نے کیا غلطی کی؟

فیصل واوڈا کے وکیل نے موقف اختیار کیا کہ ان کے موکل نے جان بوجھ کر جھوٹا بیان حلفی نہیں دیا۔ عدالت نے ریمارکس دیئے کہ الیکشن کمیشن اس نتیجے پر پہنچا کہ بیان حلفی جھوٹا ہے، ورنہ کیا کرتا۔ یہ بتائیں فیصل واوڈا اپنی نیک نیتی کیسے ثابت کرسکتے ہیں۔

وکلائے طرفین نے اپنے دلائل مکمل کئے تو عدالت نے فیصل واوڈا کی نا اہلی یا بطور سینیٹر بحالی سے متعلق فیصلہ محفوظ کر لیا۔

واضح رہے کہ چیف الیکشن کمشنر کی سربراہی میں تین رکنی بینچ نے گزشتہ ہفتے فیصل واوڈا کو دہری شہریت کیس میں نااہل قرار دیدیا تھا۔