فیصل واؤڈا نے تاحیات نااہلی چیلنج کردی

میڈیا رپورٹس  کے مطابق  فیصل واؤڈا نے ہائیکورٹ میں وسیم سجاد ایڈووکیٹ کے ذریعے درخواست جمع کرائی جس میں انہوں نے مؤقف اختیار کیا کہ الیکشن کمیشن نا اہلی کا فیصلہ دینے کا مجاز نہ تھا۔ درخواست میں استدعا کی گئی ہے کہ الیکشن کمیشن کا 9 فروری 2022 ء کا نااہلی کا فیصلہ کالعدم قرار دیا جائے۔

واضح رہے کہ چیف الیکشن کمشنر کی سربراہی میں تین رکنی بینچ نے گزشتہ ہفتے فیصل واوڈا کو دہری شہریت کیس میں نااہل قرار دیدیا تھا۔

تحریری فیصلے میں کہا گیاہے کہ  فیصل واؤڈا نے کاغذات نامزدگی جمع کراتے وقت غلط بیانی حلفی جمع کرایا، غلط بیان حلفی جمع کرانا آرٹیکل 62 ون ایف کے زمرے میں آتا ہے، فیصل واؤڈا بطور ایم این اے تمام تنخواہیں اور مراعات واپس کریں،  انہوں نے خود کو اپنے کنڈکٹ سے مشکوک بنایا۔

  تحریری فیصلہ میں کہا گیا  کہ  فیصل واؤڈانے بطور ایم این اے سینیٹ الیکشن میں ووٹ ڈالا،  بطور ایم این اے ووٹ ڈالنے کے بعد خود کو بطور سینیٹ امیدوار پیش کر دیا، غلط بیان حلفی جمع کرانے پر فیصل واوڈا کا سینیٹ کا نوٹیفکیشن واپس کیا جاتا ہے۔

واضح رہے کہ فیصل واؤڈا نااہلی کیس میں درخواست گزاروں کا مؤقف تھا کہ وفاقی وزیر نے بطور امیدوار قومی اسمبلی ریٹرننگ افسر کو کاغذات نامزدگی جمع کراتے وقت اپنی امریکی شہریت چھپائی، الیکشن کمیشن کے متعدد بار پوچھنے کے باجود فیصل واؤڈا نے امریکی شہریت چھوڑنے کی تاریخ نہیں بتائی۔

خیال رہے کہ الیکشن کمیشن نے فیصل واؤڈا نا اہلی کیس کا فیصلہ 23 دسمبر کو محفوظ کیا تھا۔