وزیراعظم نے طلبہ کیلئے وظائف سے متعلق شکایات پورٹل کا اجراء کردیا 

تفصیلات کے مطابق اسلام آباد میں  تقریب سے  خطاب کرتے ہوئے  وزیراعظم عمران خان نے کہا کہ طلباء کی شکایت پر  فیصلہ کیا کہ  جدید نظام لائیں، اسکالر شپ کا کیا طریقہ کار ہو اور کن مضامین پر اسکالر شپ دی جائے۔

وزیراعظم  نے کہا کہ  پاکستان میں تعلیم کا معیار اوپر نہیں جارہا، کئی مضامین کی پاکستان میں اہمیت ہی ختم ہوگئی ہے،  حکومت سنبھالی تو اندازہ نہیں تھا کتنی اسکالرشپس دی جانی چاہئیے ۔ طلبا نے کئی بار شکایت کی کہ ہمیں نظرانداز کیا گیا، دوران تعلیم اسکالرشپس ختم ہونے سے طلبا کو مشکلات کا سامنا تھا ،  طلباء کے پیسے رک جاتے ہیں، وہ دھکے کھاتے پھرتے ہیں، ہم چاہتے ہیں طلباء پڑھائی پر توجہ دیں، انہیں پیسوں کی فکر نہ ہو۔

ان کا کہنا تھا کہ  رحمت اللعالمین ﷺ اسکالر شپس کے پیچھے بہترین حکمت پوشید ہ ہے، اس کا مقصد قوم کی تعمیر ہے، رسول اللہ  ﷺ ایک طبقے کے لیے نہیں ساری دنیا کے لیے رحمت اللعالمین تھے، رحمت اللعالمین ﷺ اسکالر شپس صحیح اورغلط کا فرق بتانےکےلیے ہیں، رسول اللہ ﷺ کے راستے پر چلنے سے عظیم رہنما جنم لیتے ہیں، نوجوانوں کو رحمت اللعالمین ﷺ اسکالرشپس سے فائدہ اٹھانا چاہیے، اسکالر شپ میں میرٹ کو مدنظر رکھا جائے تو منفرد کامیابی بن جاتی ہے۔

وزیراعظم عمران خان  نے مزید کہا کہ بھارت میں تعلیم پر بہت زیادہ پیسہ خرچ کیا جاتا ہے، نوجوانوں کو ریاست مدینہ کے اصولوں سے روشناس کرانا ہمارا فرض ہے، ہمیں اپنی نوجوان نسل کو اسلام کے اعلیٰ اقدار سے آگاہی دینی ہے، اسکالر شپس کا مقصد نوجوانوں کو ٹیکنالوجی کی جانب لے جانا ہے، طلبا کے مسائل کا تدارک کیا جائے گا۔

واضح رہے کہ  اس پورٹل کا بنیادی مقصد طلبہ کو درپیش مسائل فوری حل کرنا ہے۔یہ پورٹل وزیر اعظم سٹیزن پورٹل سے منسلک ہو گا اور وزیر اعظم کا دفتر شکایات کے بروقت ازالے کی نگرانی کرے گا۔