بیرون ملک مقیم پاکستانیوں کو تمام ممکن سہولیات فراہم کی جائیں گی : وزیرخارجہ

تفصیلات کے مطابق وزیرخارجہ شاہ محمود قریشی نے  دبئی میں مقیم پاکستانیوں سے خطاب کرتے ہوئے حکومت کے اِس عزم کا اعادہ کیا کہ بیرون ملک مقیم پاکستانیوں کو تمام ممکن سہولتیں فراہم کی جائیں گی ۔ ان کا کہنا تھا کہ  بیرون ملک مقیم پاکستانیوں کے لئے مختار نامے کی تصدیق کو ڈیجیٹلائز کر دیا گیا ہے،  وراثتی سرٹیفکیٹ کی راہ میں حائل رکاوٹیں ختم کر دی گئی ہیں۔

وزیرخارجہ نے کہا  کہ جو  ملک معاشی طور پر مستحکم نہ ہوں تو دنیا ان کی بات کو سنتی ضرور ہے لیکن توجہ نہیں دیتی، ہم نے اسی وجہ سے جغرافیائی اقتصادی ترجیحات پر توجہ مرکوز کی ہے، ہماری خواہش ہے کہ ہم اپنی جغرافیائی پوزیشن کو بروئے کار لاتے ہوئے پاکستان کو اقتصادی مرکز بنانے میں کامیاب ہو سکیں۔

شاہ محمود قریشی کا کہنا تھا کہ حکومت پاکستان پہلی دفعہ اتفاق رائے سے ایک سیکیورٹی پالیسی کا مسودہ سامنے لائی ہے ، اس سیکورٹی پالیسی کا محور معاشی استحکام ہے، اس میں پاکستان کا آبی تحفظ اور فوڈ سیکورٹی بھی شامل ہے، آج بھارت سندھ طاس معاہدے پر کبھی عمل کرتا ہے اور کبھی نہیں کرتا، ہمارے سفارت کاروں کو اقتصادی سفارت کاری کی ذمہ داری سنبھالنا ہوگی ، اقتصادی سفارت کاری محض درآمدات، برآمدات تک محدود نہیں بلکہ یہ ایک جامع تصور ہے، ہم نے سفراء کی کارکردگی جانچنے کے پیمانوں میں اسے شامل کر دیا ہے۔

انہوں نے کہا کہ میں واضح کرنا چاہتا ہوں کہ وزارتِ خارجہ اور ہمارے سفارت خانے تنہا ان اہداف کو حاصل نہیں کر سکتے ، وزیر اعظم عمران خان صاحب کا وژن بھی یہی ہے کہ بیرون ملک مقیم پاکستانیوں کا بھرپور خیال رکھا جائے، متحدہ عرب امارات میں 1.6 ملین کے قریب پاکستانی مقیم ہیں ، آپ سب یہاں پاکستان کے سفیر ہیں،  آپ نے یہاں اپنی محنت سے اپنا نام کمایا، بدقسمتی سے ہم ماضی میں بیرون ملک مقیم پاکستانیوں کی اہمیت کو نہیں سمجھ سکے، ہماری حکومت نے بیرون ملک مقیم پاکستانیوں کی فلاح و بہود کو اپنی ترجیح سمجھا ہے۔

وزیرخارجہ کا کہنا تھا کہ 2018 میں جب ہم حکومت میں آئے تو ہمارے تمام اقتصادی اشاریے منفی رجحان ظاہر کر رہے تھے،  ہمیں 20 ارب ڈالر کے خسارے کا سامنا تھا، آج ہماری معیشت استحکام کے راستے پر گامزن ہے، اور 5.37 فیصد گروتھ کے ساتھ آگے بڑھ رہی ہے، پاکستان غریب ملک نہیں ہے اللہ تعالیٰ نے ہمیں بے پناہ وسائل سے نوازا ہے، بس ہمیں درست سمت درکار ہے۔

وزیر خارجہ نے کہاکہ بیرون ملک مقیم پاکستانیوں نے روشن ڈیجیٹل اکائونٹ سکیم اور نیا پاکستان سرٹیفکیٹ سے سکیم کا بڑے پیمانے پر خیر مقدم کیا ہے۔