آرمی چیف جنرل قمر جاوید باجوہ کا تربت کا دورہ

پاک فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق  آرمی چیف جنرل قمر جاوید باجوہ نے تربت کا دورہ کیا، اس دوران انہیں بلوچستان کی سیکیورٹی صورتحال پر تفصیلی بریفنگ دی گئی۔ آرمی چیف کو بارڈر مینجمنٹ اقدامات پر بھی بریف کیا گیا۔

آئی ایس پی آر کا کہنا ہے کہ  آرمی چیف  جنرل قمر جاوید باجوہ نے فوجی دستوں کی آپریشنل تیاریوں اور جوانوں کے عزم کو سراہا۔ آرمی چیف نے دہشت گردوں کے خلاف کامیاب آپریشنز پر اطمینان کا اظہار کیا۔

ترجمان پاک فوج کے مطابق آرمی چیف جنرل قمر جاوید باجوہ  نے تربت یونیورسٹی کا بھی دورہ کیا ، آرمی چیف کے ساتھ مختلف مکاتب فکر کے نمائندوں نے   بات چیت کی، شرکاء میں ڈسٹرکٹ کیچ کے قبائلی عمائدین، سیاسی و معروف شخصیات، طلباء، وکلاء اور خواتین شامل تھیں۔

اس موقع پر گفتگو کرتے ہوئے آرمی چیف جنرل قمر جاوید باجوہ نے کہا کہ  بلوچستان کے نوجوان بہت باصلاحیت ہیں،  نوجوان تعلیم و ہنر کے مواقع سے فائدہ اٹھائیں جو ان کے لیے فراہم کیے گئے ہیں۔آرمی چیف نے کہا کہ  نوجوان مقامی قانون نافذ کرنے والے اداروں میں شامل ہو کر اپنے علاقے کی سیکیورٹی و استحکام کے لیے کردار ادا کریں۔