مسجد  میں گانے کی عکسبندی : عدالت  نے صبا قمر ،  بلال سعید کی بریت کی درخواست مسترد کردی

تفصیلات کے مطابق جوڈیشل مجسٹریٹ ثروت بتول  کی عدالت میں مسجد وزیر خان میں گانے کی عکسبندی کے کیس کی سماعت ہوئی   جوڈیشل مجسٹریٹ  نے ملزمان کی مقدمے سے بریت کی درخواست پر محفوظ فیصلہ سنادیا۔

 عدالت نے اپنے   عبوری فیصلے میں  ملزمہ صبا قمر اور ملزم بلال سعید کی بریت کی درخواست مسترد کردی۔

پراسیکیوشن  نے عدالت میں موقف اختیار کیا کہ   ملزمان کی جانب سے گانے بجا کر  مسجد کے تقدس کو پامال کیاگیا ہے۔ہمارے پاس تمام ثبوت یو ایس بی میں موجود ہیں، یو ایس بی میں ان کے ڈانس کی فوٹیج موجود ہے، مسجد مسلمانوں کے عبادت کی جگہ ہے ڈانس کرنے کی جگہ نہیں ہے۔

سماعت کے دوران اداکارہ صبا قمر کے وکیل نے عدالت کو بتایا کہ محکمہ اوقاف کی انکوائری رپورٹ بھی ہمارے حق میں ہے، اوقاف کے ریجنل مینجر اخلاق احمد کی رپورٹ کے مطابق دوران شوٹنگ نہ غیر اخلاقی لباس پہنا گیا اور نہ ہی کوئی غیر اخلاقی حرکت ہوئی۔

قبل ازیں  مقامی عدالت نے مسجد وزیر خان میں شوٹنگ اور ویڈیو بنانے کے معاملے پر اداکارہ صبا قمر اور بلال سعید کی بریت کی درخواست پر فیصلہ محفوظ کیا تھا۔