رمضان المبارک میں بینکوں کے اوقات کار تبدیل

اسٹیٹ بینک نے رمضان المبارک میں بینکوں کے دفتری اور صارفین کیلئے اوقات کار جاری کردئیے ہیں۔

تفصیلات کے مطابق رمضان المبارک میں پیر سے جمعرات بینکس صبح دس سے ڈیڑھ بجے تک صارفین کو سہولت فراہم کریں گے۔ جبکہ جمعے کو بینکس صبح دس سے دوپہر ایک بجے تک صارفین کو سہولت فراہم کریں گے۔ رمضان المبارک میں بینکوں کے ملازمین کیلئے دفتری اوقات پیر سے جمعرات صبح دس بجے سے شام چار بجے تک ہوں گے۔ جبکہ جمعے کو بینکوں کے دفتری اوقات صبح دس سے ایک بجے تک ہوں گے۔

دوسری جانب قومی ایئرلائن (پی آئی اے) نے ماہ رمضان کے لئے نئے دفتری اوقات کار کا شیڈول جاری کردیا، سی ای او پی آئی اے ایرمارشل ارشد ملک کی منظوری کے بعد رمضان کے دفتری اوقات کا نوٹیفکیشن بھی جاری کیا گیا‌۔

تفصیلات کے مطابق قومی ایئرلائن (پی آئی اے) نے ماہ رمضان کے لئے نئے دفتری اوقات کار کا اعلان کردیا، جس کے تحت پیر تا جمعرات صبح 10سے4بجے سہ پہر تک دفتری اوقات ہوں گے،نوٹیفکیشن میں کہا گیا کہ رمضان المبارک کے دوران پیر تا ہفتہ دفتری اوقات صبح 10 سے شام 4 بجے تک ہوں گے اور نماز ظہر ادائیگی کے لئے دوپہر ایک سے 1:30بجے تک وقفہ ہوگا۔پی آئی اے کا کہنا ہے کہ جمعہ کے نماز جمعہ ادائیگی کے لئے دوپہر ایک سے 2 بجے ایک گھنٹہ کا وقفہ ہوگا۔ 

واضح رہے کہ رمضان کے مقدس مہینے میں ملازمین کو سہولت فراہم کرنے کے لیے نجی اور سرکاری اداروں کے اوقات کار میں کمی کی جاتی ہے۔

خیال رہے محکمہ موسمیات نےپیشگوئی کی ہے کہ رمضان کا چاند 29 شعبان یعنی 2 اپریل کو نظر آنے کا امکان ہے اور پہلا روزہ 3 اپریل بروز اتوار ہوگا۔