وزیر اعظم نے منحرف اراکین کیخلاف ریفرنسز دائر کرنے کی منظوری دے دی

تفصیلات کے مطابق وزیر اعظم عمران خان نے منحرف اراکین کی جانب سے بھیجے جانے والے جوابات نا معقول قرار دیتے ہوئے یکسر مسترد کردیے ہیں۔

میڈیا ذرائع کے مطابق حکمران جماعت کے منحرف اراکین اسمبلی کو وضاحت کیلئے دیا گیا وقت ختم ہوگیا ہے جس کے بعد وزیر اعظم کی جانب سے منحرفین کے خلاف فیصلہ کن کارروائی کی ہدایت کی گئی ہے۔

بتایا گیا ہے کہ اس حوالے سے تحریک انصاف کے مشیر  پارلیمانی امور  بابر اعوان اور  ایڈیشنل سیکرٹری جنرل عامر کیانی کے درمیان ملاقات ہوئی ہے۔

ملاقات کے بعد جاری اعلامیے کے مطابق چیئرمین پاکستان تحریک انصاف عمران خان کی ہدایات کی روشنی میں منحرف اراکین کیخلاف ریفرنسز  تیار کرلیے گئے ہیں۔

منحرف اراکین کے خلاف دستاویزی ثبوت بھی ریفرنسز کے ساتھ بھجوائے جائیں گے۔

واضح رہے کہ پارٹی پالیسی کی خلاف ورزی پر حکمران جماعت تحریک انصاف نے 13 کے قریب اراکین قومی اسمبلی کو شوکاز نوٹس جاری کیے تھے۔