وزیر اعظم کا فواد چودھری کو وزارت قانون کا قلمدان سونپنے کا فیصلہ

تفصیلات کے مطابق وفاقی وزیر اطلاعات فواد چودھری نے کہا کہ انہیں وزارت قانون کا قلمدان سونپا جا رہا ہے، وزیر قانون بننے کے بعد فوری طور پر شہباز شریف کی ضمانت منسوخ کرنے کا حکم دوں گا۔

اسلام آباد میں وفاقی وزیر توانائی حماد اظہر اور معاون خصوصی شہباز گل کے ہمراہ میڈیا سے گفتگو کرتے ہوئے فواد چودھری کا کہنا تھا کہ ہم کل صبح ہی میں عدالت کو کہیں گے کہ شہباز شریف اور حمزہ شہباز کی ضمانت منسوخ کرنے کا عمل شروع کیا جائے۔

فواد چودھری نے کہا کہ شہباز شریف کی طرح کئی لوگوں کے وزیراعظم بننے کا خواب ٹوٹے گا۔

ان کا کہنا تھا کہ مجھے حیرت ہے کہ عدالت سے ضمانت لے کر بیٹھا ہوا شخص وزارت عظمیٰ کا امیدوار ہونے کا دعویٰ کررہا ہے۔

انہوں نے کہا آئندہ 48 گھنٹوں میں سیاسی اعتباز سے بہت سی چیزیں ہیں، شیروانیاں سلوا کر بیٹھنے والوں کی شیروانیاں ٹنگی رہ جائیں گی۔

انہوں نے پنجاب کی وزارت اعلیٰ سے متعلق کہا کہ کل پرویز الٰہی وزیر اعلیٰ پنجاب بنیں گے۔