وزیر اعلیٰ پنجاب کی تقرری آئینی اور پر امن طریقے سے کی جائے:سپریم کورٹ

تفصیلات کے مطابق سپریم کورٹ آف پاکستان نےعدم اعتماد پر ووٹنگ نہ ہونے کے معاملے پر آج ہونے والی سماعت کا حکم نامہ جاری کیا ہے۔حکم نامے کے مطابق پنجاب کی وزارت اعلیٰ کے لیے تقرری کو آئینی حدود میں رہتے ہوئے پر امن طریقے سے کرنے کا حکم دیا گیا ہے۔

کہا گیا ہے کہ عدالت کے لیے تشویش ناک بات ملک میں امن و امان کی صورت حال کو برقرار رکھنا ہے۔ عدالت کی جانب سے قومی اسمبلی میں تمام سیاسی جماعتوں اور سیاسی قوتوں کو حکم دیا جاتا ہے کہ وہ امن و امان برقرار رکھیں، اس کے ساتھ ساتھ تمام ریاستی اداروں اور اہلکاوں کو کسی بھی قسم کے غیر آئینی اقدام سے گریز کرنے کا کہا گیا ہے۔یہ بھی کہا گیا کہ عدالت جائزہ لے گی کہ ڈپٹی اسپیکر کے اقدام کو آرٹیکل 69 کے تحت تحفظ حاصل ہے یا نہیں۔

واضح رہے کہ پنجاب اسمبلی کے آج کے اجلاس میں شدید ہنگامہ آرائی ہوئی اور اجلاس محض 6 منٹ ہی چل سکا۔ہنگامہ آرائی کے باعث ڈپٹی اسپیکر دوست محمد مزاری نے اسمبلی اجلاس 6 اپریل تک ملتوی کر دیا۔