دورہ ساؤتھ افریقہ کیلئے قومی اسکواڈ میں شامل ایک کھلاڑی کا کورونا ٹیسٹ مثبت آگیا

تفصیلات کے مطابق  دورہ ساؤتھ افریقہ کے لیے قومی اسکواڈ میں شامل ایک کھلاڑی کا کورونا ٹیسٹ مثبت آگیا ،  کورونا ٹیسٹ مثبت آنے والے کھلاڑی کا کل دوبارہ کورونا ٹیسٹ ان  کے گھر پر ہوگا ۔منفی آنے والے تمام کھلاڑی کل لاہور میں رپورٹ کریں گے ۔

پاکستان کرکٹ بورڈ  ( پی سی بی)  نے ساوتھ افریقہ سیریز کے لیے گزشتہ روز 35 افراد کے کورونا ٹیسٹ کیے تھے۔پنجاب حکومت  کی پی سی بی کو قومی وائیٹ بال اسکواڈ کا تربیتی کیمپ لگانے کی اجازت  دے دی،قومی ٹیم 19 مارچ سے قذافی اسٹیڈیم میں پریکٹس کا آغاز کرے  گی۔کیمپ کے دوران قومی کھلاڑی پچاس اوورز پر مشتمل دو انٹرا اسکواڈ پریکٹس میچز بھی کھیلیں گے۔

خیال رہے کہ   پاکستان سپر لیگ 6 کو کورونا وائرس کے باعث ملتوی کردیا گیا تھا۔پی ایس ایل کی ٹیموں میں شامل چند کھلاڑیوں کے کورونا ٹیسٹ مثبت آئے تھے۔اس کے علاوہ  پاکستان کرکٹ بورڈ کے ہیڈ آفس میں بھی کورونا وائرس  کے کیسز سامنے آنے کے بعد تمام ملازمین کے ٹیسٹ لیے گئے  تھے اور 3 دن کیلئے پی ڈی بی ہیڈ آفس کو بھی بند کردیا گیا تھا۔