وزیر اعلیٰ خیبر پختونخوا کے خلاف بھی تحریک عدم اعتماد جمع کروا دی گئی

میڈیا ذرائع کے مطابق عوامی نیشنل پارٹی کے رکن صوبائی اسمبلی سردار بابک نے کہا کہ غیر آئینی اقدامات کو روکنے کے لیے تحریک عدم اعتماد جمع کی ہے۔

انہوں نے کہا کہ وزیر اعلیٰ کے پی کے کیخلاف عدم اعتماد کی تحریک اپوزیشن لیڈر اور تمام اپوزیشن جماعتوں کی مشاورت سے جمع کروائی گئی ہے۔

اس ضمن میں رکن صوبائی اسمبلی خوشدل خان نے کہا کہ تحریک عدم اعتماد پر اراکین کی تعداد 20 فی صد سے زیادہ ہے۔

واضح رہے کہ وفاقی میں وزیر اعظم عمران خان کے خلاف اپوزیشن اتحاد نے تحریک عدم اعتماد جمع کروا رکھی ہے جس پر کل ہونے والے اسمبلی اجلاس کے ایجنڈے کے مطابق ووٹنگ ہوگی۔

اس سے قبل سابق وزیر اعلیٰ پنجاب عثمان بزدار کے خلاف بھی عدم اعتماد کی تحریک جمع کروائی گئی تاہم وہ ووٹنگ سے قبل ہی مستعفی ہو گئے تھے۔

گزشتہ روز اسپیکر پنجاب اسمبلی چودھری پرویز الہٰی کے خلاف مسلم لیگ ن نے تحریک عدم اعتماد جمع کروائی تھی۔