کویت کے وزیر خارجہ دوروزہ سرکاری دورے پرآج پاکستان پہنچ گئے

تفصیلات کے مطابق کویتی وزارت خارجہ ،وزارت صحت، وزارت داخلہ اور وزارت صنعت و تجارت کے اعلیٰ حکام پر مشتمل ایک وفد بھی اُن کے ہمراہ ہوگا۔ دورے کے دوران وزیر خارجہ شاہ محمود قریشی سے تفصیلی بات چیت کے علاوہ کویتی وزیر خارجہ دیگر اہم شخصیات سے بھی ملاقات کریں گے۔

یہ بات قابل ذکر ہے کہ پاکستان کویت کے ساتھ اپنے برادرانہ تعلقات کو انتہائی اہمیت دیتا ہے جومشترکہ مذہب و اقدا ر کے بندھنوں میں بندھے ہیں۔ پاکستان خلیج تعاون کونسل کے ارکان کے درمیان بہتر تعلقات کیلئے کویت کے مثبت کردار کو تسلیم کرتا ہے۔پاکستان مسلمان ممالک کے درمیان یکجہتی کو مضبوط بنانے کیلئے کویت کی کوششوں کے ساتھ کھڑا ہے۔کویتی وزیر خارجہ کے دورے سے دونوں ممالک کے درمیان تعلقات اور بڑھتے ہوئے تعاون کیلئے مثبت اقدامات کو مزید تقویت حاصل ہوگی۔

خیا ل رہے کہ  کویتی وزیرخارجہ پاکستانی ہم منصب شاہ محمود قریشی کی دعوت پر پاکستان پہنچ رہے ہیں ۔ گزشتہ روزوزیر داخلہ شیخ رشید احمد نے پریس کانفرنس میں  کہا تھا کہ کویت کے لیے 2011 سے بند ویزوں کا اجرا جلد کیا جائے گا۔ اُن کا کہنا تھا کہ حکومت کی طرف سے یہ خوشخبری سنانے جارہا ہوں کہ کویت کے ویزے بحال ہونے جارہے ہیں جو 2011 سے بند تھے۔جس دن کویت نے ہوائی اڈے کھولے، اُسی روز سے ویزے بھی کھل جائیں گے، جس کے بعد لوگوں کے روزگار کا اہم مسئلہ بھی حل ہوجائے گا۔