آرٹیکل 63 اے کی تشریح سے متعلق صدارتی ریفرنس سماعت کے لیے مقرر

تفصیلات کے مطابق آرٹیکل 63 اے متعلق صدارتی ریفرنس کی تشریح چیف جسٹس عمرعطا بندیال کی سربراہی میں 5 رکنی لارجر بنچ کرے گا۔

میڈیا ذرائع کے مطابق سپریم کورٹ کا لارجر بنچ 12 اپریل کو سماعت کرے گا، جسٹس اعجاز الاحسن،جسٹس مظہر عالم، جسٹس منیب اختر اور جسٹس جمال خان مندوخیل 5 رکنی لارجر بنچ کا حصہ  ہوں گے۔

اس ضمن میں عدالت کی جانب سے اٹارنی جنرل سمیت دیگر فریقین کو نوٹس جاری کر دیا گیا ہے۔

علاوہ ازیں سپریم کورٹ بار کی جانب سے تحریک عدم اعتماد سے قبل جلسے جلوس روکنے کے لیے بھی درخواست دائر کی گئی تھی، وہ بھی سماعت کے لیے مقرر کر لی گئی ہے۔

بتایا گیا ہے کہ سپریم کورٹ بار کی درخواست پر سماعت بھی صدارتی ریفرنس  کے ساتھ 12 اپریل کو ہو گی۔