کابینہ نے دھمکی آمیز خط اہم ملکی شخصیات سے شیئر کرنے کی اجازت دے دی

میڈیا ذرائع کے مطابق وفاقی کابینہ نے وزیر اعظم عمران خان کے زیر صدارت خصوصی اجلاس میں یہ فیصلہ کیا ہے کہ دھمکی آمیز خط اہم ملکی شخصیات کے ساتھ شیئر کیا جائے گا۔

کابینہ کی جانب سے یہ منظوری دی گئی ہے کہ دھمکی آمیز خط چیف جسٹس آف پاکستان، اسپیکر قومی اسمبلی اور چیئرمین سینیٹ کو پیش کیا جائے گا۔

واضح رہے کہ وزیر اعظم کے زیر صدارت کابینہ اجلاس کا صرف ایک ہی ایجنڈا تھا، میٹنگ میں دھمکی آمیز خط سے متعلق ہی تبادلہ خیال کیا گیا۔

اجلاس میں کابینہ اراکین سے پوچھا گیا کہ دھمکی آمیز خط کو ملک کی اہم شخصیات کے ساتھ شیئر کیا جانا چاہیے یا نہیں؟

کابینہ نے اس بات کی منظوری دی کہ دھمکی آمیز خط چیف جسٹس، اسپیکر قومی اسمبلی اور چیئرمین سینیٹ کے ساتھ شیئر کیا جانا چاہیے۔

اجلاس میں یہ فیصلہ بھی ہوا کہ وزیر اعظم عمران خان استعفیٰ نہیں دیں گے۔

ذرائع جی این این کے مطابق وزیر اعظم عمران خان کی پارلیمنٹ ہاؤس آمد بھی متوقع ہے جس کے پیش نظر پارلیمنٹ ہاؤس کی سکیورٹی سخت کر دی گئی ہے جبکہ وزیر اعظم کے چیمبر کے باہر بھی اضافی سکیورٹی اہلکار تعینات کر دیے گئے ہیں۔

وزیر اعظم عمران خان کو آگاہ کر دیا گیا ہے کہ 12 بجے چیف جسٹس کے حکم پر عدالت لگے گی اور عدالتی فیصلے پر عمل در آمد کا جائزہ لیاجائے گا۔