وزیراعظم کا انتخاب: پی ٹی آئی نے اپنے اراکین کو خط لکھ دیا، ہدایات جاری

تفصیلات کے مطابق تحریک انصاف کے اراکین کو خط پارٹی کے سیکرٹری جنرل اسد عمر کی جانب سے لکھا گیا ہے جس میں  اراکین کو نئے وزیراعظم کے انتخاب کے لیے ہدایات جاری کی گئی ہیں۔  

خط میں کہا گیا ہےکہ تمام اراکین قومی اسمبلی وزیراعظم کے الیکشن کے دوران ایوان میں حاضر رہیں گے۔

خط میں پی ٹی آئی اراکین کو وزارتِ عظمیٰ کے لیے اپنے امیدوار  شاہ محمود  قریشی کو ووٹ دینے کی ہدایت دی گئی ہے جبکہ  ووٹ نہ ڈالنے والوں کو متنبے کیا گیا کہ پارٹی پالیسی پر عمل نہ کرنے والے رکن کے خلاف آرٹیکل 63 اے تحت کارروائی ہوگی جس کے تحت ان کو پارٹی سے برخاست اور قومی اسمبلی  کی نشست سے نااہل کردیا جائےگا۔

خط میں مزیدکہا گیا ہےکہ تحریک انصاف کی پارلیمانی پارٹی کا اجلاس 12 بجے ہوگا لہٰذا ارکان پارلیمانی اجلاس میں شرکت یقینی بنائیں۔

واضح  رہے کہ قومی اسمبلی آج نئے وزیراعظم کا انتخاب کرے گی ، نئے وزیر اعظم کے انتخاب کیلئے شہباز شریف متحدہ اپوزیشن کے متفقہ امیدوار ہیں جبکہ پاکستان تحریک انصاف نے شاہ محمود قریشی کو امیدوار نامزد کیا ہے۔

وزیراعظم کے عہدے کیلئے پاکستان مسلم لیگ(ن) کے صدر شہباز شریف اور پاکستان تحریک انصاف کے شاہ محمود قریشی کے کاغذات نامزدگی منظور کرلئے گئے، پی ٹی آئی نے ن لیگی صدر کے کاغذات نامزدگی پر اعتراضات اٹھائے تھے جن کو مسترد کردیا گیا تھا۔