وفاقی کابینہ کی تشکیل کیلئے وزیراعظم کا اتحادیوں سے مشاورت کا فیصلہ

ذرائع کے مطابق وزیر اعظم شہباز شریف آج اتحادی جماعتوں کے قائدین سے ملاقات کریں گے ۔ وزیراعظم شہباز شریف آصف زرداری، مولانا فضل الرحمان اور ایم کیو ایم ، بی این پی کے سربراہان سے ملاقات کرینگے۔ 

اتحادی جماعتوں کے قائدین سے ملاقات میں کابینہ  کی تشکیل سمیت حکومتی امور پر مشاورت ہوگی۔ اتحادی جماعتوں کے قائدین سے مشاورت کے بعد وفاقی کابینہ کا اعلان جلد ہوگا۔

یاد رہے کہ سابق وزیر اعظم عمران خان کے خلاف تحریک عدم اعتماد کی کامیابی کے بعد مسلم لیگ ن کے صدر شہباز شریف نے وزیرا عظم کا حلف اٹھایا ہے ۔  مسلم لیگ ن ، پیپلز پارٹی، ایم کیو ایم،  جے یو آئی اور باپ پارٹی  اس وقت حکومتی اتحاد کا حصہ ہیں اور تمام پارٹیوں میں اہم وزارتوں کی تقسیم کا امکان ہے۔ 

واضح رہے کہ سابق وزیراعظم عمران خان کے خلاف تحریک عدم اعتماد کامیاب ہونے کے بعد ایوان نےاپوزیشن جماعتوں کے امیدوار شہبازشریف کوملک کا وزیراعظم منتخب کیا تھا۔

پی ٹی آئی نے شاہ محمود قریشی کووزیراعظم کا امیدوار نامزد کیا تھا تاہم پی ٹی آئی ارکان نے بعد میں انتخاب کا بائیکاٹ کرتے ہوئے اجتماعی استعفے دے دئیے تھے۔