گورنر پنجاب عمر سرفراز چیمہ کو عہدے سے ہٹا دیا گیا

تفصیلات کے مطابق وفاقی حکومت نے گورنر پنجاب عمر سرفراز چیمہ کو عہدے سے ہٹانے کی سمری صدر مملکت کو بھیج دی ہے۔

میڈیا رپورٹس کے مطابق وزیر اعظم شہباز شریف نے صوابدیدی اختیارات استعمال کرتے ہوئےگورنر پنجاب کو عہدے سے ہٹایا ہے۔

بتایا گیا ہے کہ گورنر پنجاب عمر سرفراز چیمہ نے وزیر اعلیٰ پنجاب کے انتخاب پر مؤقف دینے کے لیے گورنر ہاؤس میں ہنگامی پریس کانفرنس طلب کر رکھی تھی۔

پریس کانفرنس میں صحافیوں نے عہدے سے ہٹائے جانے پر سوال کیا تو انہوں نے کہا کہ مجھے اس طرح سے نہیں ہٹایا جاسکتا۔

عمر سرفراز نے کہا کہ ابھی صرف سمری بھیجی گئی ہے، صدر مملکت کے پاس سمری پر دستخط کرنے کے لیے 15دن کا وقت ہوتا ہے۔

گورنر پنجاب نے میڈیا سے گفتگو میں بتایا کہ وزیر اعظم کے پاس مجھے عہدے سے ہٹانے کا اختیار نہیں ہے، یہ اختیار صدر کے پاس ہوتا  ہے۔

عمر سرفراز چیمہ کا کہنا تھا کہ انہوں نے وزیر اعلیٰ پنجاب حمزہ شہباز کی تقریب حلف برداری مؤخر کر دی ہے۔

انہوں نے بتایا کہ میرے پاس معلومات آئیں تو میں نے رپورٹ منگوائی جس کی روشنی میں تقریب حلف برداری کو مؤخر کیا ہے۔