کراچی سے  لاپتہ ہونے والی دعا زہرہ کی گمشدگی  کا ڈراپ سین

ذرائع کے مطابق  گزشتہ روز کراچی پولیس نے لاہور پولیس کے ساتھ دعا زہرہ کا نکاح نامہ شیئر کیا تھا جس کے بعد  لاہور پولیس نے اس سلسلے میں تحقیقات شروع  کیں۔

رپورٹس کے مطابق  نکاح نامے پر موجود ایک گواہ اصغر  علی ہے جس کی رہائش حویلی لکھا کی بتائی گئی تھی ،  پولیس نے اس سراغ کے ذریعے اوکاڑہ پولیس سے رابطہ کیا تو  اوکاڑہ پولیس نے حویلی لکھا سے اصغر علی کو حراست  میں لے لیا۔

پولیس ذرائع کا کہنا ہےکہ اصغر علی سے تفتیش کی گئی تو اس نے بتایا کہ دعا اور اس کا شوہر ظہیر دونوں اس کے پاس یہاں آئے تھے اور اب یہاں سے جاکر پاکپتن میں موجود ہیں۔

دعا زہرہ نے اپنی مرضی سے شادی کرنے کا وڈیو بیان بھی جاری کردیا ہے ، بیان میں دعا زہرہ کا کہنا ہے کہ اس نے اپنی مرضی سے ظہیر احمد سے شادی کی ہے ۔ لڑکی نے اپنے بیان میں کہا کہ والدین تشدد کرتے تھے اور زبردستی شادی کروانا چاہتے تھے ، میری عمر اٹھارہ سال ہے، گھروالوں نے غلط عمر بتائی ہے۔

لڑکی کا کہنا ہے کہ مجھے کسی نے بھی اغوا نہیں کیا، میں اپنی مرضی سے گھر سے آئی  ہوں اور  کوئی  قیمتی سامان ساتھ نہیں لائی ،  میں اپنے گھر میں خاوند کے ساتھ بہت خوش ہوں، خدارا مجھے تنگ نہ کیا جائے .

دعا زہرہ خاوند کے حق میں بیان حلفی بھی دے چکی ہے،  بیان حلفی میں دعا زہرہ نے 17 اپریل کو ظہیر احمد سے  نکاح کی تصدیق کی۔ 

علاوہ ازیں دعا زہرہ نے والد سمیت دیگر کے خلاف ہراساں کرنے سے روکنے کی درخواست  سیشن کورٹ میں دائر کردی ، عدالت نے کارروائی کرتے ہوئے متعلقہ لاہور  پولیس اور دیگر فریقین کو ہراساں کرنے سے روک دیا۔

دعا زہرہ کیس میں اہم پیشرفت،والد اور رشتداروں کی شامت آگئی#GNN #duazahra #Childmarriage pic.twitter.com/Ski2KjMAWD

— GNN (@gnnhdofficial) April 26, 2022