پاکستان میں ایران کے قونصل جنرل حسن نوریان نے کہا کہ ایران اور پاکستان کے درمیان طویل عرصے سے تاخیر کا شکار گیس پائپ لائن منصوبے کو مکمل کرنے کے مختلف طریقوں پر غور کیا جارہا ہے۔

انہوں نے کراچی پریس کلب میں میڈیا کے نمائندوں سے بات کرتے ہوئے کہا کہ ہم اس منصوبے کو مکمل کرنے کے لیے پاکستان کی جانب سے سیاسی عزم کو دیکھتے ہیں۔

ایرانی قونصل جنرل نے کہا کہ پاک ایران گیس پائپ لائن بین الاقوامی پابندیوں کے تحت نہیں آتی ہےاور یہ کہ دونوں ممالک اس معاملے پر بات کر رہے ہیں۔

واضح رہے کہ دونوں ممالک نے 2010 میں ایران کے جنوبی فارس گیس فیلڈ سے بلوچستان اور سندھ کے صوبوں تک پائپ لائن کی تعمیر کے معاہدے پر دستخط کیے تھے لیکن امریکی پابندیوں کے خدشات کے باعث پاکستان کے حصے پر کام روک دیا گیا ہے۔

نائب وزیراعظم اور وزیرخارجہ اسحاق ڈار نے پندرھویں او آئی سی سربراہی اجلاس کے موقع پر گیمبیا میں مقیم پاکستانیوں سے ملاقا ت کی۔

اسحاق ڈار نے پاکستانی برادری کو مسئلہ کشمیر اور اسلام کے خلاف منفی سوچ کے حوالے سے اجلاس کے دوران ہونے والی ملاقاتوں اور دیگر سرگرمیوں سے آگاہ کیا، پاکستانیوں نے پاک، گیمبیا تعلقات کو مزید مستحکم بنانے کیلئے تجاویز پیش کیں۔

انہوں نے ملاقات کا موقع فراہم کرنے پر نائب وزیراعظم کا شکریہ ادا کیا ۔

صدر مملکت  آصف علی زرداری دو روزہ سرکاری دورے پر کوئٹہ پہنچے ہیں ۔

تفصیلات کے مطابق گورنر بلوچستان جعفرخان مندوخیل، وزیراعلی میرسرفراز احمد بگٹی ، صوبائی وزراء اور ارکان پارلیمنٹ نے ہوائی اڈے پر صدر کا استقبال کیا ۔

صدر مملکت  کو اس دورے میں بلوچستان میں جاری ترقیاتی منصوبوں اور امن وامان کی صورتحال کے حوالے سے بریفنگ دی جائے گی۔

صدر آصف علی زرداری سے بلوچستان اسمبلی کے ارکان بھی ملاقات کریں گے اور وزیراعلی سرفراز بگٹی ان کے اعزاز میں عشائیہ دیں گے۔