آئندہ مالی سال کے بجٹ میں ٹیکس چھوٹ میں کمی کی جائے گی:چیئرمین ایف بی آر

چئیرمین ایف بی آر عاصم احمد نے جی این این سے گفتگو میں کہا کہ آئی ایم ایف سے بجٹ اور ٹیکس چھوٹ پر بات چیت جاری ہے، آئندہ مالی سال کے بجٹ میں ٹیکس چھوٹ میں کمی کی جائے گی۔

انہوں نے کہا کہ عام آدمی کے لیے دی گئی ٹیکس چھوٹ ختم کرنے پر آئی ایم ایف سے متفق نہیں ہوں گے،عام آدمی کے فائدے کے لیے کچھ ٹیکس چھوٹ جاری رہ سکتی ہیں۔

چئیرمین ایف بی آر نے کہا کہ آئندہ مالی سال کے لیے ایف بی آر کو بڑا ٹیکس ہدف ملے گا،رواں مالی سال کے لیے ایف بی آر کا ٹیکس ہدف بڑھا دیا گیا،نظرثانی شدہ ہدف 6 ہزار 1 سو ارب حاصل کیا جائے گا۔

انہوں نے کہا کہ اس وقت تمام کوششیں رواں مالی سال کا ٹیکس ہدف حاصل کرنے پر ہیں،آئندہ مالی سال کے لیے جو ہدف رکھا جائے گا اسے حاصل کریں گے،آئندہ مالی سال کا ٹیکس ہدف حاصل کرنے کے لیے پالیسی اقدامات کیے جائیں گے۔