مسلح افواج کا معیشت کے استحکام کے لیے اخراجات کم کرنے کا فیصلہ

میڈیا رپورٹس کے مطابق مسلح افواج کی جانب سے معیشت کے استحکام کے لیے بڑے فیصلے عمل میں لائے گئے ہیں جن میں مختلف ایریاز میں اپنے اخراجات کم کرنے کا فیصلہ کیا گیا ہے۔

افواج نے یوٹیلٹی بلز کی مد میں اپنےاخراجات کو مزید محدود کردیا ہے، ڈیزل اور پیٹرول کی بچت کے لیے اہم اقدامات اٹھاتے ہوئے جمعہ کے روز پوری فوج میں ڈرائےڈے ہو گا جس میں سوائے ایمرجنسی کے کوئی بھی سرکاری ٹرانسپورٹ نہیں چلےگی۔

بتایا گیا ہے کہ افواج پاکستان نے پی او ایل کی خصوصی بچت کے لیے تربیت اورانتظامی ضروریات کو کم کیا ہے،غیرملکی معاہدوں کو مقامی کرنسی میں تبدیل کیا گیا ہے جبکہ عسکری نقل وحرکت میں کمی اورجدید ٹیکنالوجی کے استعمال کا فیصلہ بھی کیا گیا ہے۔

عسکری تربیت کے لیے بھی دور دراز علاقوں کے بجائے مقامی ایریا میں ٹریننگ کا فیصلہ کیا گیا ہے، کانفرنسز اوردیگر اہم امور کے لیے کام آن لائن ہوگا۔ 

مزید برآں پاک فوج کی جانب سے کوروناکی مد میں ملی رقم میں سے 5 ارب روپے بچاکرحکومت کو واپس کیے گئے،رواں سال دفاعی بجٹ قومی بجٹ کا صرف 16 فیصد ہے۔