معمول سے زیادہ بارشوں کا امکان، وزیر اعظم کی فوری اقدامات کی ہدایت

تفصیلات کے مطابق محکمہ موسمیات کی جانب سے آئندہ دس روز بعد ملک بھر میں معمول سے زیادہ اور تیز بارشوں کا امکان ظاہر کیا گیا ہے جس پر وزیر اعظم کی جانب سے فوری اقدامات کی ہدایات جاری کر دی گئی ہیں۔

وزیر اعظم شہباز شریف نے متعلقہ محکموں اور وزارتوں کو الرٹ رہنے کی ہدایت کرتے ہوئے کہا کہ محکمہ موسمیات کی پیش گوئی کو مدنظر رکھتے ہوئے زیادہ بارشوں کی زد میں آنے والے علاقوں میں ابھی سے انتظامات کو یقینی بنایا جائے۔

انہوں نے وفاق اور صوبوں کے اشتراک عمل سے جامع حکمت تیار کرنے اور زرعی علاقوں میں فصلوں، مویشیوں کی حفاظت کے لیے تدابیر اختیار کرنے کی بھی ہدایت کی ہے۔

وزیر اعظم کی جانب سے کہا گیا ہے کہ ممکنہ طور پر خطرے کی زد میں آنے والے علاقہ کے مکینوں کو بروقت خبردار کیا جائے، پیشگی حفاظتی انتظامات اور امدادی سازوسامان کی دستیابی کے لیے بروقت اقدامات کیے جائیں، نکاسی آب، نالوں اور آبی گزرگاہوں کی صفائی کو یقینی بنایا جائے۔