پنجاب بجٹ: مزدور کی کم سے کم اجرت میں بھی اضافہ کر دیا گیا

صوبہ پنجاب میں سال 23-2022 کا صوبائی بجٹ پیش کردیا گیا ہے جس میں مزدور کی کم سے کم اجرت 20 ہزار روپے سے بڑھا کر 25  ہزار روپے مقرر کردی گئی ہے، بجٹ پنجاب کے وزیر خزانہ اویس لغاری نے پیش کیا جس کا حجم 32 کھرب 26 ارب روپے ہے۔

بجٹ تقریر میں صوبائی وزیر خزانہ نے اعلان کیا کہ سرکاری ملازمین کی تنخواہوں میں 15 فیصد جبکہ پنشن میں 5 فیصد اضافے کا فیصلہ کیا گیا ہے۔

واضح رہے کہ پنجاب اسمبلی کا اجلاس گورنر پنجاب کی ہدایات کے مطابق پنجاب اسمبلی کی بجائے ایوان اقبال میں ہوا جس کی صدارت ڈپٹی اسپیکر پنجاب اسمبلی دوست محمد مزاری نے کی۔

منگل کے روز پنجاب اسمبلی میں ہونے والی افراتفری کے بعد گورنر پنجاب نے اسمبلی کا اجلاس برخاست کرتے ہوئے بدھ کو 3 بجے ایوان اقبال میں دوبارہ اجلاس طلب کر رکھا تھا جبکہ اسپیکر پرویز الٰہی نے اسمبلی اجلاس بدھ کو 1 بجے ایوان میں طلب کیا تھا۔