گورنر پنجاب نے ہاؤس کا تقدس پامال کیا، وہ کون ہوتا ہے اجلاس بلانے والا:پرویز الٰہی

اسپیکر پنجاب اسمبلی چودھری پرویز الٰہی نے تحریک انصاف کے رہنماؤں کے ہمراہ پریس کانفرنس کرتے ہوئے ایوان اقبال میں اجلاس کو غیر جمہوری قرار دیا۔

انہوں نے کہا کہ گورنر پنجاب نے ہاؤس کا تقدس پامال کیا ہے، وہ کون ہوتا ہے اجلاس کو بلانے والا، جب اسپیکر موجود ہے تو ڈپٹی اسپیکر کس حیثیت سے اجلاس کی صدارت کر رہا ہے، انہوں نے کہا کہ ان کا غیر قانونی کام ختم کردیا ہے، آئندہ یہ ایسی جرات نہیں کریں گے۔

اسپیکر پنجاب اسمبلی نے سابق وزیر اعظم نواز شریف کو ہدف تنقید بناتےہوئے کہا کہ نواز شریف کہتا ہے ووٹ کوعزت دو، کیا پنجاب اسمبلی کوعزت دی گئی ہے، گورنر کے ذریعے پنجاب اسمبلی کے اختیارات کو کم کرنے کی کوشش کی گئی، ہم نے قرار داد کے ذریعے گورنر کے آرڈیننس کو ختم کردیا ہے اب اس کی کوئی حیثیت نہیں ہے۔

انہوں نے کہا کہ اسمبلی کی خودمختاری کے لیے ہر فورم پر جائیں گے، اداروں کو کمزور کرنا خود کو کمزور کرنا ہے، اسٹاف ہے نہ سیکریٹری ہے آرڈیننس لاکر گند ڈالا گیا ہے۔

واضح رہے کہ حکومت اور اپوزیشن میں جاری ڈیڈ لاک کے باعث گورنر پنجاب نے پنجاب اسمبلی کی بجائے ایوان اقبال میں اجلاس بلا کر آئندہ مالی سال کا بجٹ پیش کردیا، جبکہ اسپیکر پنجاب اسمبلی نے اجلاس پنجاب اسمبلی میں طلب کر رکھا تھا۔