روس نے دنیا کو بے پناہ سستا تیل بیچ ڈالا،ہم یہاں بھکاریوں کے وینٹی لیٹر پر جا پڑے:حماد اظہر

سماجی رابطے کی ویب سائیٹ ٹوئیٹر پر جاری پیغام میں سابق وفاقی وزیر حماد اظہر نے کہا کہ آج آزاد خارجہ پالیسی کی اہمیت سب کے سامنے عیاں ہے۔

انہوں نے کہا کہ روس نے دنیا کے درجنوں آزاد ممالک کو بے پناہ سستا تیل بیچ ڈالا ہے جبکہ ہم یہاں بھکاریوں کے وینٹی لیٹر پر جا پڑے ہیں۔

رہنما تحریک انصاف نے مزید کہا کہ روس کے سفیر نے بھی اب تو کہہ دیا ہے کہ ہم سستا تیل بیچنے کو تیار ہیں، عمران حان کو روس کے دورے کی وجہ سے نکالا گیا۔

واضح رہے کہ حکومت کی جانب سے ملک میں تیسری مرتبہ پیٹرولیم مصنوعات کی قیمتوں میں ہوشربا اضافے کا اعلان کر دیا گیا ہے۔

وزیر خزانہ مفتاح اسماعیل نے نیوز کانفرنس میں اعلان کیا کہ پیٹرول کی قیمت میں 24 روپے 3 پیسے اضافہ کیا جا رہا ہے جس کے بعد پیٹرول کی نئی قیمت 233 روپے 89 پیسے ہو گئی ہے۔

حکومت کی جانب سے پیٹرول کی قیمت میں اضافے کے ساتھ ڈیزل کی قیمت میں بھی  59 روپے فی لیٹر اضافہ کر دیا گیا ہے جس کے بعد ڈیزل کی نئی قیمت 263 روپے 31 پیسے فی لیٹر ہو گئی ہے۔

مزید برآں لائٹ ڈیزل کی قیمت میں 29 روپے 61 پیسے جب کہ مٹی کے تیل کی قیمت میں 29 روپے59 پیسے فی لیٹر کا اضافہ کیا گیا ہے۔

اس حوالے سے وزیر خزانہ مفتاح اسماعیل  نے کہا کہ حکومت فیصلہ کر چکی، اب پٹرولیم مصنوعات کے معاملے میں کوئی نقصان برداشت نہیں کرے گی۔

حکومت کی جانب سے پیٹرولیم مصنوعات کی قیمتوں میں اضافے کا اعلان کر دیا گیا ہے جس کے بعد نئی قیمتوں کا اطلاق آج رات 12 بجے سے ہو گا۔