فیفا فٹبال ورلڈ کپ 2026 کیلئے میزبان شہروں کا اعلان کردیا گیا 

تفصیلات کے مطابق فٹبال ورلڈ کپ  ٹورنامنٹ 2026   امریکا، کینیڈا اور میکسیکو  کے 16 شہروں میں منعقد ہوگا۔

ورلڈ کپ 2026 کے میچز امریکا کے 11، میکسیکو کے 3 اور کینیڈا کے 2 شہروں میں ہوں گے۔امریکا، میکسیکو اور کینیڈا کے جن شہروں میں 2026 کا فٹبال ورلڈکپ کھیلا جائے گا ان کے نام مندرجہ ذیل ہیں۔ 

امریکا،لاس اینجلس ،ہیوسٹن ، نیویارک/نیو جرسی ، میامی، اٹلانٹا،سیٹل،سان فرانسسکو ، کانسز سٹی ، ڈلاس ، فلاڈیلفیا ، کانسس سٹی ، میکسیکو ، میکسیکو شہر ، گواڈالاجارا ، مونٹیری ، کینیڈا ، وینکوور ، ٹورونٹو شامل ہیں ۔ 

یہ پہلا موقع ہوگا کہ  2026  کے ٹورنامنٹ میں موجودہ 32 ٹیموں کے فارمیٹ کے بجائے 48 ٹیمیں شامل ہوں گی، اس کے علاوہ  پہلی بار ٹورنامنٹ تین میزبان ممالک میں منعقد کیا جائے گا۔

فیفا کے صدر گیانی انفنٹینو نے  اس حوالے سے  جاری بیان میں مذکورہ شہروں کو ورلڈ کپ کی میزبانی پر مبارک باد پیش کرتے ہوئے  ان کے جذبے کو سراہا ، ان کاکہنا تھا کہ  یہ ممالک اور شہر مل کر اس ورلڈ کپ کو زمین کا سب سے بڑا شو بنا دیں گے۔

انھوں نے کہا ہم فٹبال کو حقیقی معنوں میں عالمی بنانے کی کوشش کر رہے ہیں، اس سلسلے میں یہ ورلڈ کپ گیم چینجر ثابت ہوگا۔

واضح رہے کہ امریکا، کینیڈا اور میکسیکو کو 2018 میں 2026 کے فٹبال ورلڈکپ کی میزبانی کیلئے منتخب کیا گیا تھا۔ 

خیال رہے کہ اس سے قبل امریکا نے 1994 میں ورلڈ کپ کی میزبانی کی تھی جبکہ  میکسیکو  1970 اور 1986 میں ٹورنامنٹ کی میزبانی کرچکا ہے ۔

 کینیڈا میں پہلی بار مردوں کے ورلڈ کپ کا کوئی میچ منعقد ہوگا، اگرچہ کینیڈا نے 2015 میں خواتین کے عالمی کپ کی میزبانی کی تھی۔