چوہدری شجاعت کاوزارت اعلی ٰ پنجاب کیلئے پرویز الہیٰ کی حمایت کا اعلان

تفصیلات کے مطابق پنجاب کی وزارت اعلی ٰ کیلئے جوڑ توڑ کا سلسلہ جاری ہے ، چوہدری شجاعت حسین نے  اہم بیان میں کہا ہے کہ چوہدری پرویز الہٰی ہی وزارتِ اعلیٰ کیلئے پارٹی کے امیدوار ہیں۔

انہوں نے کہا کہ جن کو مینڈیٹ ملا حکومت کرنا اُس کا حق ہے، ایک بار نہیں دو تین بار پہلے بھی یہی بات کہہ چکا ہوں. ان کا اشارہ ضمنی الیکشن میں پی ٹی آئی کی جیت کی طرف  تھا جس کے بعد پی ٹی آئی کے حمایت یافتہ امیدوار اور چوہدری شجاعت کے کزن پرویز الٰہی کو حکومت بنانے کے لیے پنجاب اسمبلی میں سادہ اکثریت حاصل ہو گئی ہے۔

سربراہ ق لیگ چوہدری شجاعت کا مزید کہنا تھا  کہ ملکی مسائل کا حل اسی میں ہے کہ گنتی کے چکروں سے باہر نکلا جائے اور غریب آدمی کے مسائل کی طرف توجہ دی جائے، جو غریبوں کے مسائل حل کرنے میں کامیاب ہو گا حقیقی معنوں میں اسی کی گنتی پوری ہو جائے گی۔

چوہدری شجاعت نے مزید کہا کہ جو منتخب ہوئے ہیں وہ عوام کی خدمت کریں، اس فکر میں نہ پڑیں کہ ایک دوسرے کو کیسے نیچے دکھانا ہے۔

انہوں نے کہاکہ ملکی مسائل کا حل اسی میں ہے کہ سال ڈیڑھ سال حکومت کا موقع ملنا چاہیے یا فوری انتخابات ہوں، فوری انتخابات سے مراد فوری ہیں مہینوں میں نہیں۔

دوسری جانب آصف علی زرداری آج مسلم لیگ ق کے صدر چوہدری شجاعت سے پھر ملاقات کریں گے۔