لاہورسمیت پنجاب کے مختلف علاقوں میں بارش ، موسم خوشگوار 

تفصیلات کے مطابق لاہور سمیت پنجاب کے  مختلف علاقوں میں بادل جم کر برسے ،  بارش سے گرمی کے ستائے شہریوں کے چہرے کھل اٹھے ۔ 

بارش اور ٹھنڈی ہوا چلنے کے  باعث جہاں  گرمی حبس  میں نمایاں کمی  ہوئی ہے  وہیں  شہر کے نشیبی علاقے بھی زیر آب آگئے ۔ 

لاہور کے علاقے  گرین ٹاون،  ٹاون شپ ملتان روڈ، مال روڈ، شملہ پہاڑی ، گڑھی شاہو،  فیروزپور روڈ ،  سبزہ زار سمن آباد بند روڈ کے علاقوں میں  بارش ہوئی ، سب سے زیادہ بارش تاج پورہ میں 179 ملی میٹر ریکارڈ کی گئی۔ 

لاہور کے گردونواح قصور ، شیخوپورہ ، مرید کے اور پنجاب کے دیگر شہروں میں بھی کہیں کم اور کہیں تیز بارش  ہوئی ،   محکمہ موسمیات کے مطابق آئندہ چوبیس گھنٹوں میں وقفہ وقفہ سے بارش جاری رہے گی۔ 

دوسری جانب محکمہ موسمیات نے  اسلام آباد میں تیز ہواؤں اور  گرج چمک کے ساتھ بارش کی پیشگوئی کی ہے ۔  محکمہ موسمیات کے مطابق  شہر کا کم سے کم درجہ حرارت 24 جبکہ ذیادہ سے ذیادہ 33 ڈگری تک رہنے کا امکان ہے۔ 

محکمہ موسمیات کے مطابق  سندھ میں موسم گرم اور مرطوب رہے گا جبکہ خیبر پختونخوا کے بیشتر اضلاع میں تیز ہواؤں کے ساتھ بارش کا امکان ہے ۔

 بلوچستان میں موسم گرم اور مرطوب رہنے کا امکان ہے ،کشمیر اور گلگت بلتستان میں مطلع ابر آلود رہنے کے علاوہ  تیز بارش متوقع ہے ۔