بلوچستان : طوفانی بارشوں سے جاں بحق افراد کی تعداد 90 ہوگئی 

صوبائی ڈیزاسٹر مینجمنٹ اتھارٹی کی رپورٹ کے مطابق بلوچستان میں بارشوں کے باعث مختلف واقعات میں 90 افراد جاں بحق جبکہ 62 زخمی ہوچکے ہیں۔

پی ڈی ایم اے رپورٹ   کے مطابق   گزشتہ 24گھنٹوں کے دوران مزید 6افراد بارشوں کی نذر ہوگئے ، جاں بحق ہونیوالوں میں بچوں کی بڑی تعداد شامل ہے۔  

پی ڈی ایم اے رپورٹ کے مطابق    جاں بحق ہونے والوں میں 28 خواتین، 38مرد اور 11 بچے شامل ہیں، سب سے زیادہ اموات بولان، کوئٹہ، ژوب، دکی، خضدار ، کوہلو، کیچ، مستونگ، ہرنائی، قلعہ سیف اللہ اور سبی میں ہوئی،  مجموعی طور پر صوبے بھر میں 3128 مکانات منہدم ہوئےہیں ۔ 

بلوچستان میں بارشوں اور سیلاب سے 4 قومی شاہراؤں اور 9 پلوں سمیت چمن، ڈیرہ بگٹی، پشین، تربت اور قلعہ عبداللہ میں 7 ڈیموں کو بھی نقصان پہنچا ہے۔

بلوچستان میں مون سون کی بارشوں اور سیلابی ریلوں سے متاثرہ علاقوں میں پیٹ اور آنتوں کی بیماریوں سے 2 ہفتوں کے دوران اب تک 11 افراد جاں بحق جبکہ 3 ہزار سے زائد متاثر ہوچکے ہیں۔

یاد رہے کہ بلوچستان حکومت نے حالیہ طوفانی بارشوں اور سیلاب سے ہونے والے جانی و مالی نقصانات کے پیش نظر صوبے کے 10 اضلاع کو آفت زدہ علاقے قرار دیا ہے ۔  مشرقی بلوچستان کے بیشتر اضلاع میں رابطہ سڑکیں متاثر ہوئی ہیں جبکہ شہریوں کو بارش میں بلوچستان پنجاب بارڈر شاہراہ استعمال کرنے سے اجتناب کرنے کی ہدایت بھی کی گئی ہے۔