پاک فضائیہ کے آپریشنل ائیر بیس پر کثیرالملکی فضائی مشق ایسز میٹ 2021 کا آغاز

ترجمان پاک فضائیہ کے مطابق  پاک فضائیہ کے آپریشنل ائیر بیس پر کثیرالملکی فضائی مشق ایسز میٹ 2021 کا آغاز ہوگیا۔ مشقوں میں پاکستان، سعودی عرب اور امریکہ کی فضائی افواج حصہ لے رہی ہیں۔ بحرین، مصر اور اردن کی فضائی افواج کو بطور مبصر مشقوں میں شرکت کی دعوت دی گئی ہے۔

 ترجمان پاک فضائیہ کے مطابق  ائیر وائس مارشل وقاص احمد سلہری، ڈپٹی چیف آف ائیر سٹاف (آپریشنز) افتتاحی تقریب کے مہمانِ خصوصی تھے۔

ائیر وائس مارشل وقاص احمد سلہری نے کہا کہ  ایسز میٹ مشقوں میں حصہ لینے والی فضائی افواج بذات خود آپریشنل سرگرمیوں میں مصروف رہی ہیں،  مشقوں کے انعقاد کا مقصد باہمی مفادات کے حصول  کیلئے بین الاقوامی شرکاء کے تجربات سے استفادہ حاصل کرنا ہے۔

ترجمان پاک فضائیہ کا کہنا ہے کہ اردن اور سعودی عرب کے دفاعی اتاشیوں اور امریکہ کے ائیر اتاشی نے بھی افتتاحی تقریب میں شرکت کی۔