چینی سکینڈل : جہانگیر ترین اور انکے خاندان کیخلاف دو مزید مقدمات درج

تفصیلات  کے مطابق ایف آئی اے تحریک انصاف کے رہنما  جہانگیر ترین اوران کے بیٹے  علی ترین پر پہلے بھی مقدمہ درج کرچکا ہے،  ایف آئی اے نے سوا تین ارب روپے کے مالیاتی فراڈ  اور منی لانڈرنگ پر جہانگیر ترین اور فیملی کے دیگر افراد پر مقدمہ درج کیا۔ دائر ایف آئی آر میں چینی کی ذخیرہ اندوزی ،خوردبرداوردھوکادہی کاالزام لگایا گیاہے ۔ مقدمہ میں سابق سیکرٹری ایگری کلچر رانا نسیم کو  بھی شامل  کیا گیا ہے ۔ایف آئی اے کے مطابق  رانا نسیم ہی اصل میں شوگر مل مافیا کی سرپرستی کرتے رہے ہیں۔  جہانگیر ترین نے اپنے داماد کی کاغذ بنانے والی بند فیکٹری میں جے ڈی ڈبلیو کمپنی سے سوا تین ارب منتقل کیے۔ بند فیکٹری میں منتقل ہونے والی رقم بعد ازاں فیملی ممبران کے اکاؤنٹس میں منتقل ہوئی۔ جہانگیر ترین کی فیکٹری میں 26 فیصد پبلک شئیر ہولڈرز ہیں۔  دوسرے مقدمہ میں جہانگیر ترین ، انکے بیٹے علی ترین اور دو بیٹیوں کے نام بھی شامل ہیں ۔ اس سے قبل جہانگیر ترین کے خلاف درج کیے گئے مقدمے میں ایف آئی اے نے 7 اعشاریہ 4 ملین ڈالرز کی منی لانڈرنگ کر کے رقم برطانیہ منتقل کرنے اور وہاں جائیدادیں خرید نے کا الزام عائد کیا تھا۔

جہانگیر ترین  کا ردعمل :

دوسری جانب  پاکستان تحریک انصاف کے رہنما جہانگیر ترین نے وفاقی تحقیقاتی ادارے (ایف آئی اے) کے الزامات کو بےبنیاد اور من گھڑت  قرار دے دیا ہے۔پی ٹی آئی رہنما جہانگیر ترین  نے مبینہ فراڈ اور منی لانڈرنگ مقدمات   پر ردعمل دیتے ہوئے   کہا ہے کہ میرے اور میرے بچوں پر غلط ایف آئی آرز درج کی گئیں،  تمام شیئرز قانونی، کھاتے قانون کے مطابق منتقل کیے گئے۔  بیرون ملک منتقل کی گئی رقم پر ٹیکس ادا کیا گیا  ہے ۔

جہانگیر ترین نے کہا کہ نجی آڈٹ فرم میری کمپنیوں کے اکاؤنٹس کو پہلے ہی درست قرار دے چکی ہے۔ایف آئی اے کو تمام کاغذات مہیا کرچکا ہوں،  مالی امور پر ہر طرح سے کلین ہوں ۔ ان کاکہنا تھا کہ مقدمے کا اندارج افسوسناک ہے، حقائق کو نظر انداز کیا گیا، بیٹے علی ترین کے تمام اثاثے قانونی ذرائع سے بنائے گئے،  میرے بیٹے کے پاس اثاثوں کی مکمل منی ٹریل موجود ہے،  جے ڈی ڈبلیو کی فاروقی پلپ ملز میں سرمایہ کاری ایک حقیقی کاروباری ٹرانزیکشن تھی،  یہ کمپنی کی دوسری کمپنی میں سرمایہ کاری تھی ،ایف آئی اے کا الزام بھونڈا ہے۔ جہانگیر ترین نے مزید کہا کہ  قانون کا احترام کرتا ہوں ، تحقیقات کے دوران تعاون کیا گیا،  میرے اور خاندان کے تمام اثاثے ڈکلیر ہیں۔