عوام کیلئے مافیا کے سامنے کھڑا ہوں، کھڑا رہوں گا،وزیراعظم

تفصیلات کے مطابق  وزیراعظم کی زیرصدارت بنی گالا میں میڈیا اسٹریٹجی کمیٹی اجلاس ہوا،  اجلاس میں ملک کی تازہ ترین سیاسی صورتحال پر تبادلہ خیال کیا گیا، حکومت کی میڈیا اسٹریٹجی کے حوالے سے بھی بات چیت کی گئی ۔

وزیر اعظم عمران خان نے کہا کہ  پہلی حکومت ہے جو مافیا کے سامنے کھڑی ہوئی ہے، ہم نے اپنا دیکھا نہ پرایا،بلاتفریق احتساب کیا، عوام کیلئے مافیا کے سامنے کھڑا ہوں، کھڑا رہوں گا۔ ماضی کی حکومتوں کی کرپشن مہنگائی کی وجہ ہے۔

انہوں نے کہا کہ  سٹے باز، قبضہ اور شوگر مافیا نے غریب عوام کی جیبوں پر ڈاکہ ڈالا ہے، آنے والے دنوں میں مہنگائی میں کمی آئے گی،  عالمی سرمایہ کاروں نے یورو بانڈز میں اعتماد کا اظہار کیا ہے، پاکستانی معیشت کے اچھے دن آنے والے ہیں۔

وزیراعظم کا کہنا تھا کہ  جو بھی عوام کے مفاد کو نقصان پہنچائے گا اسے نہیں چھوڑیں گے، اس سال کے آخر تک پورے پنجاب میں صحت کارڈ فراہم کر دیں گے۔کمیشن رپورٹ میں مافیا اور سٹے بازوں کو ذمہ دار قرار دیا گیا ہے۔

وزیر اعظم عمران خان نے کہا کہ  ماضی کی حکومتوں کی وجہ سے مہنگائی کا سامنا ہے،  رمضان میں پناہ گاہیں میں  سحر اور افطار کا انتظام کیا جائےگا ۔ ذخیرہ اندوزوں پر نظر رکھی جائے گی  ۔وزیر اعظم کا کہنا تھا کہ  رمضان میں ہر چیز کی نگرانی کروں گا۔