کشمیر کو حق خود ارادیت دئیے بغیر بھارت کیساتھ تجارت بحال نہیں کریں گے: وزیر اعظم

تفصیلات کے مطابق وزیر اعظم عمران خان کے زیر صدارت کابینہ اجلاس میں اصولی موقف اپنایا گیا کہ مقبوضہ کشمیر کا مسئلہ حل ہوئے بغیر بھارت سے تجارت نہیں ہو سکتی ۔ اس سے غلط تاثر جائے گا ہم کشمیر  کو نظر انداز کر کے بھارت سے تجارت کر رہے ہیں، کشمیریوں کو حق خود ارادیت دیے بغیر بھارت سے تجارت نہیں ہو سکتی ۔

بھارت کے ساتھ تعلقات کے حوالے سے اس اہم اجلاس میں وزیر خارجہ مخدوم شاہ محمود قریشی اور وزارت خارجہ کے اعلیٰ حکام شریک ہوئے۔ وزارت خارجہ نے بھارت کے ساتھ تجارت کے حوالے سے تجاویز پر بریفنگ دی۔

ذرائع کے مطابق اجلاس میں بھارت کے ساتھ تجارت بحال نہ کرنے کے فیصلے پر اتفاق کرتے ہوئے کہا گیا کہ مقبوضہ کشمیر کی آئینی صورتحال بحال ہونے تک کسی قسم کی تجارت نہیں ہو سکتی۔

وزیراعظم عمران خان کا کہنا تھا کہ ہمارا اصولی موقف ہے کہ کشمیر کا مسئلہ حل کئے بغیر بھارت کے ساتھ تجارت نہیں ہوگی، اس سے غلط تاثر جائے گا کہ ہم کشمیر کو نظر انداز کرکے بھارت سے تجارت شروع کریں۔ کشمیر کو حق خود ارادیت دئیے بغیر بھارت کے ساتھ تعلقات نارمل نہیں ہوسکتے۔

یاد رہے کہ گزشتہ روز وفاقی کابینہ نے بھارت سے چینی اور کپاس درآمد کرنے کی تجویز مسترد کردی تھی۔ ای سی سی نے بھارت سے چینی اور کپاس منگوانے کی تجویز پیش کی تھی۔