سو فیصد یقین ہے کہ مجھے نااہل کرنے کا منصوبہ بنا ہوا ہے،عمران خان

الیکشن کمیشن کے بیٹ رپورٹرز سے ملاقات میں عمران خان کا کہنا تھا الیکشن کمیشن کے سامنے کسی صورت پیش نہیں ہوں گا۔

عمران خان کا کہنا تھا کہ اوورسیز پاکستانیوں کو سیاسی عمل سے دور کیا جا رہا ہے، انتخابی قوانین میں اوورسیز پاکستانیوں کے حوالے سے ترمیم ہوئی تو اسے چیلنج کریں گے۔

سابق وزیراعظم کا کہنا تھا کہ ای وی ایم روکنےمیں مرکزی کردار چیف الیکشن کمشنرکا تھا۔ انہوں نےتجویز دی کہ چیئرمین نیب ، الیکشن کمیشن کے سربراہ اور ارکان کے تقرر کا طریقہ کارتبدیل ہونا چاہیے۔

عمران خان کا کہنا تھا کہ ڈسکہ الیکشن کے بعد انہیں پتا چلا کہ گیم ہی کوئی اور ہو رہی ہے تاہم ان کا کہنا تھا کہ چیف الیکشن کمشنر کوئی بھی ہو عام انتخابات ہر صورت لڑیں گے۔

چیئرمین تحریک انصاف کا کہنا تھا کہ الیکشن شفاف نہ ہوئے تو جو ہوگا ملک اس کا متحمل نہیں ہو سکتا۔