معروف صحافی آئی اے رحمان انتقال کرگئے

تفصیلات کے مطابق انسانی حقوق کمیشن کے بانی رہنما اور صحافی  آئی اے رحمٰن  کی عمر 90برس تھی، ان  کے اہل خانہ کے مطابق آئی اے رحمٰن  شوگر اور بلڈ پریشر کے مرض میں مبتلا تھے۔  آئی اے رحمٰن ستمبر  1930ء میں ہریانہ میں پیدا ہوئے ۔ آئی اے رحمٰن نے انسانی حقوق کمیشن پاکستان کے ذریعے عوامی حقوق کی جدوجہد سمیت آزادی اظہار، انصاف کی فراہمی اور آئین کے تحفظ کے لیے بھی قلم  کے ذریعے آوازبلند کی ۔ انہوں نے  چھ دہائیوں سے زائد عرصے تک  صحافت  کے شعبے میں خدمات سرانجام دیں  ۔

 انہوں نے 1988سے 90 کے دوران پاکستان ٹائمز کے چیف ایڈیٹر کے طور پر خدمات انجام دیں۔ مشرقی پاکستان بحران کے دوران  وہ اردو روزنامہ آزاد کے منیجنگ ایڈیٹر کی حیثیت سے کام کر رہے تھے۔ انہوں نے ضیاءالحق  دور میں  ہفتہ وار ویو پوائنٹ  میں بطور ایگزیکٹو ایڈیٹر  کام کیا  ۔سینکڑوں مضامین اور مقالے شائع کرنے کے علاوہ انہوں نے تین کتابیں  بھی  لکھیں ، جن میں  ان کے اپنے کالموں کا ایک مجموعہ بھی شامل ہے ۔

آئی اے رحمان نے دو دہائیوں تک ایچ آر سی پی کے ڈائریکٹر کی حیثیت سے کام کیا اور 31 دسمبر ، 2016 تک گروپ کے سیکریٹری جنرل بھی رہے۔صحافت سمیت مختلف شعبہ ہائے زندگی سے تعلق رکھنے والے افراد نے ان کی وفات پر افسوس کا اظہار کیا ہے ۔