کراچی ایئرپورٹ سے فرار ہونے والا مطلوب دہشت گرد گرفتار

کراچی: وفاقی تحقیقاتی ادارے (ایف آئی اے) نے کراچی ایئرپورٹ سے خیبرپختونخوا میں دہشت گردی کے مقدمات میں مطلوب ملزم کے فرار کی کوشش ناکام بنادی۔

تفصیلات کے مطابق وفاقی تحقیقاتی ادارے (ایف آئی اے) کے امیگریشن سیل نے کراچی ایئرپورٹ پر کارروائی کے دوران مطلوب دہشت گرد کی ملک سے فرار کی کوشش ناکام بنا دی۔

ترجمان نے بتایا کہ ملزم احسان الحق کا نام ایف آئی اے امیگریشن کی اسٹاپ لسٹ میں شامل تھا۔ وہ خیبرپختونخوا پولیس کے محکمہ انسداد دہشت گردی کو مطلوب ہے۔

ترجمان کے مطابق محکمہ داخلہ کے پی نے گرفتار ملزم کے سر کی قیمت 10 لاکھ روپے مقرر کی تھی۔ گرفتار ملزم کا نام انتہائی مطلوب دہشت گردوں کی فہرست میں شامل ہے اور دہشت گردی کے متعدد مقدمات میں مطلوب ہے۔

ترجمان نے بتایا کہ گرفتار ملزم کا تعلق صوابی سے ہے جسے متعلقہ حکام کے حوالے کیا جائے گا۔