جاپان میں کم از کم اُجرتوں میں اکتوبر سے اضافہ کرنے کا عندیہ

ٹوکیو۔2اکتوبر (اے پی پی):جاپان بھر میں بڑھتی ہوئی قیمتوں کے تناظر میں اکتوبر کے آغاز سے کم سے کم اُجرتوں میں اضافہ کا عندیہ دیا گیا ہے، جاپانی خبررساں ادارے کے مطابق جاپان بھر میں بڑھتی ہوئی قیمتوں کے تناظر میں کم سے کم اُجرتوں میں اضافے کے بعد اوسط فی گھنٹہ اُجرت بڑھ کر ایک ہزار 4 ین، یعنی تقریباً 6.7 ڈالر ہو جائے گی۔

یہ گزشتہ سال کے مقابلے میں لگ بھگ 30 سینٹ کا ریکارڈ اضافہ ہو گا۔ٹوکیو میں فی گھنٹہ اُجرت کی سطح ایک ہزار 113 ین یعنی تقریباً 7.4 ڈالر کے ساتھ بلند ترین ہے۔

یہ سطح اِیواتے پرِیفیکچر میں 893 ین، یعنی لگ بھگ 6 ڈالر کے ساتھ کم ترین ہے۔بعض چھوٹی اور درمیانے درجے کی کمپنیوں کا کہنا ہے کہ اُن کیلئے اس اضافے کے ساتھ کاروبار جاری رکھنا مشکل ہے، جبکہ کارکنان کہتے ہیں کہ اُجرت میں یہ اضافہ مسلسل بڑھتی ہوئی قیمتوں کی تلافی کیلئے کافی نہیں ہے۔

واضح رہے کہ جاپان میں ہر سال علاقائی وزارتِ محنت کے پینل کی تجاویز کی بنیاد پر اپنی اُجرتی سطح کا فیصلہ خود کرتی ہے۔