ریاست کی رٹ قائم کرنے کےلئے کسی بھی حد تک جائیں گے، آرمی چیف

آرمی چیف جنرل سید عاصم منیرنے کہا ہے کہ ریاست کی رٹ قائم کرنے کے لیے ہر حد تک جائیں گے، ہمیں متحد ہوکر چیلنجز کا سامنا کرنا ہے۔

نگران وزیراعظم انوار الحق کاکڑ کی زیر صدارت قومی ایپکس کمیٹی کا اجلاس ہوا، جس میں سول اور عسکری حکام ، حساس اداروں کے سربراہان، چاروں صوبائی آئی جیز اور چیف سیکریٹریز نے شرکت کی۔ اجلاس میں ملک کی مجموعی امن و امان کی صورتحال کا جائزہ لیا گیا۔

اپیکس کمیٹی کے اجلاس میں آرمی چیف جنرل سید عاصم منیر نے اپنے پیغام میں کہا کہ اپیکس کمیٹی کا اجلاس ہر اعتبار سے تاریخی تھا، پاکستان کے پاس آگے بڑھنے کے لیے ایک ہی راستہ ہے۔ ہمیں متحد ہوکر چیلنجز کا سامنا کرنا ہے، ریاست کی رٹ قائم کرنے کے لیے ہرحد تک جائیں گے۔ دہشت گردی کے خلاف زیرو ٹالرینس پالیس جاری رہے گی۔

جنرل عاصم منیر نے اجلاس میں زور دے کر کہا کہ ایک پاکستانی شہری کی جان و مال اور فلاح و بہبود کسی بھی دوسرے ملک اور کسی بھی دنیاوی مفاد سے مقدم ہے۔ پاکستان کے پاس ایک ہی آپشن ہے کہ وہ آگے بڑھ کر چیلنجز کا سامنا کرے۔

آرمی چیف جنرل عاصم منیر نے آخری میں علامہ اقبال کا یہ شعر بھی پڑھا کہ ”نہ سمجھو گے تو مٹ جاؤ گے اے ہندوستان والو تمہاری داستاں بھی نہ ہوگی داستانوں میں“