لیفٹیننٹ جنرل محمد منیر افسر چیئرمین نادرا مقرر

اسلام آباد: نگراں وفاقی حکومت نے پیر کو لیفٹیننٹ جنرل محمد منیر افسر کو نیشنل ڈیٹا بیس اینڈ رجسٹریشن اتھارٹی (نادرا) کا چیئرمین مقرر کردیا۔ نگران کابینہ نے تقرری کی منظوری دے دی۔

لیفٹیننٹ جنرل منیر نادرا کے چیئرمین کے طور پر تقرری سے قبل انسپکٹر جنرل برائے کمیونیکیشن اینڈ انفارمیشن ٹیکنالوجی (آئی جی سی اینڈ آئی ٹی)بھی رہے ۔

وہ 81 پی ​​ایم اے لانگ کورس اور 16 پنجاب رجمنٹ کے ممبر ہیں۔ لیفٹیننٹ جنرل افسر، جو ہلال امتیاز (ملٹری) کے بھی وصول کنندہ ہیں، ان کو اکتوبر 2022 میں تھری اسٹار رینک پر ترقی دی گئی تھی ۔

اس سے قبل اسد رحمان نے 13 جون کو طارق ملک کے استعفیٰ کے بعد نیشنل ڈیٹا بیس اینڈ رجسٹریشن اتھارٹی (نادرا) کے قائم مقام چیئرمین کا عہدہ سنبھالا تھا۔ ایف آئی اے کی جانب سے ان کا نام نو فلائی لسٹ میں شامل کیے جانے کے بعد طارق ملک کو بیرون ملک سفر کرنے سے روک دیا گیا تھا۔