چیئرمین تحریک انصاف کی بہنوں کی ضمانت میں توسیع

چیئرمین پی ٹی آئی کی بہنوں علیمہ خانم اور عظمیٰ خانم کی عبوری ضمانتوں میں 9 دسمبر تک توسیع کردی گئی۔ انسداد دہشت گردی عدالت کے جج ارشد جاوید نے سماعت کی۔

لاہور کی انسداد دہشت گردی عدالت میں 9 مئی کو جلاؤ گھیراؤ کے مقدمات میں چیئرمین پی ٹی آئی کی بہنوں، اسدعمر اور دیگر کی ضمانتوں کی درخواست پر سماعت ہوئی۔

سابق وفاقی وزیر اسدعمر اور زین قریشی عدالت میں پیش نہ ہوئے، اور حاضری معافی کی درخواست دائر کردی، عدالت نے دونوں ملزمان کی ایک پیشی کی حاضری معافی کی درخواست منظور کرلی۔

تفتیشی افسر نے عدالت میں مؤقف پیش کرتے ہوئے استدعا کی کہ ملزمان شامل تفتیش نہیں ہورہے، تفتیش بھی مکمل نہیں ہوئی مہلت دی جائے۔

عدالت نے اسد عمر سمیت دیگر ملزمان کو شامل تفتیش ہونے کا حک دیتے ہوئے چیئرمین پی ٹی آئی کی بہنوں علیمہ خان اور عظمیٰ خان کی عبوری ضمانتوں میں 9 دسمبر تک توسیع کردی اور کیس کی سماعت ملتوی کردی۔