فلسطینیوں سے اظہار یکجہتی، جنوبی افریقہ میں اسرائیلی سفارتحانہ بند

اسرائیل کی غزہ میں ظلم و جبر کے خلاف جنوبی افریقہ کی پارلیمنٹ نے فلسطینیوں سے اظہار یکجہتی کرتے ہوئےجنوبی افریقہ میں اسرائیلی سفارت خانہ بند کرنے کی قرارداد منظور کر لی۔

عالمی خبر رساں ادارے کے مطابق پارلیمنٹ میں کثرت رائے سے یہ قرارداد منظور کی گئی جس میں کہا گیا کہ اسرائیل سے سفارتی تعلقات اُس وقت تک معطل رکھے جائیں گے جب تک اسرائیل غزہ میں جنگ بندی پر اتفاق نہیں کرلیتا۔

واضح رہے کہ گزشتہ روز غزہ میں اسرائیلی جارحیت پر جنوبی افریقہ کی جانب سے اسرائیلی سفارتخانے کو بند کرنے کی حمایت سے متعلق بیان کے بعد اسرائیل نے مشاورت کے لیے اپنا سفیر جنوبی افریقہ سے واپس بلا لیا تھا۔

جنوبی افریقہ کی حکمران جماعت افریقن نیشنل کانگریس نے اپنے بیان میں کہا تھا کہ وہ جنوبی افریقہ میں اسرائیلی سفارت خانے کو بند کرنے کے لیے پارلیمانی تحریک کی حمایت کرے گی۔

اسرائیلی وزارت خارجہ نے گزشتہ روز بیان میں کہا کہ اسرائیل نے جنوبی افریقہ کے تازہ ترین بیانات کے بعد اپنے سفیر کو مشاورت کے لیے واپس بلا لیا ہے۔ واضح رہے کہ جنوبی افریقہ نے غزہ میں اسرائیلی جارحیت کی مخالفت کرتے ہوئے اسرائیل سے اپنے سفارت کاروں کو واپس بلا لیا ہے۔