اے پی ایس کے سانحہ نے قوم کا عزم مضبوط کیا ، انوارلحق کاکڑ

نگران وزیر اعظم انوار الحق کاکڑ نے کہا ہے کہ آرمی پبلک سکول پشاور کے بڑے سانحے نے دہشت گردی کے خلاف ہماری قوم کے عزم کو مستحکم کیا۔

انہوں نے آرمی پبلک سکول کے سانحے کو 9 سال پورے ہونے کے موقع پر اپنے پیغام میں کہا کہ نو سال پہلے دشمن نے دہشت گردی کے خلاف جنگ میں اس قوم کے حوصلے کو پست کرنے کی ناکام کوشش کی۔

وزیراعظم نے کہا کہ پوری قوم کی ہمدردیاں ان والدین کے ساتھ ہیں جن کے بچوں نے اس سانحے میں اپنی جانیں قربان کیں۔

انہوں نے کہا کہ بزدل دہشت گرد اس قوم کو کبھی شکست نہیں دے سکتے۔

انہوں نے کہا کہ قوم دہشت گردی کے خلاف جنگ جیت چکی ہے اور اس نے ملک میں شورش اور انتشار پھیلانے کیلئے دشمن کے تمام حربوں کو ناکام بنا دیا ہے۔انوار الحق کاکڑ نے کہا کہ پاکستانی قوم تمام شرپسندوں کے خاتمے تک اپنی سکیورٹی فورسز کے ساتھ کھڑی ہے۔

وزیراعظم نے کہا کہ قوم پولیس، رینجرز اور پاک فوج سمیت تمام سیکورٹی فورسز کے اہلکاروں کو خراج عقیدت پیش کرتی ہے جنہوں نے اس سانحے کے بعد دہشت گردوں کو ان کی کمین گاہوں سے تلاش کیا اور ان کا خاتمہ کیا۔