پی ٹی آئی رہنما ہمایوں اختر استحکام پاکستان پارٹی میں شامل، سینیئر نائب صدر مقرر

لاہور: سینئر سیاستدان ہمایوں اختر خان نے ہفتہ کے روز باضابطہ طور پر استحکا م پاکستان پارٹی (آئی پی پی) میں شمولیت کا اعلان کیا انہوں نے ایک پریس کانفرنس کے دوران کہا کہ آج سے استحکام پاکستان پارٹی میں شمولیت کر رہا ہوں اور الیکشن بھی اسی ٹکٹ سے لڑوں گا    ان کے ہمراہ آئی پی پی کے سرپرست اعلیٰ جہانگیر خان ترین اور آئی پی پی کے صدر عبدالعلیم خان بھی تھے۔

انہوں نے کہا کہ میں نے اپنے آئی پی پی ساتھیوں کے ساتھ کافی وقت گزارا ہے، اور قسمت نے ہمیں ایک بار پھر اکٹھا کر دیا ہے ۔ 

9 مئی کے واقعات پر بات کرتے ہوئے  انہوں نے اتحاد کی اہمیت پر زور دیتے ہوئے کہا کہ اس دن ہونے والی توڑ پھوڑ کے بعد پاکستان تحریک انصاف (پی ٹی آئی) سے علیحدگی کا اعلان کیا تھا ۔ ہمایوں اختر خان نے مزید کہا کہ جہانگیر ترین خان ایک بلند پایہ شخصیت ہیں، اور عبدالعلیم خان میرے لیے چھوٹے بھائی کی طرح ہیں۔

 جہانگیر خان ترین نے خوشی کا اظہار کرتے ہوئے  کہا کہ یہ بڑی خوشی کی بات ہے کہ ہمایوں اختر خان اب آئی پی پی کا حصہ ہیں اور انہیں آئی پی پی کا سینئر نائب صدر نامزد کیا گیا ہے۔