ملکہ کو ہسار مری میں موسم سرما کی پہلی برفباری

مری :ملکہ کوہسار مری میں ہلکی بارش کیساتھ برف باری کے آثار موجود ہیں جبکہ مری سے ملحقہ علاقے گلیات کے پہاڑوں پرموسم سرما کی پہلی ہلکی برفباری شروع ہو گئی ہے جس سے سردی کی شدت میں اضافہ ہو گیا ہے ۔ بارش اور ژالہ باری کے باعث روڈ ٹریفک حادثات سمیت لینڈ سلائیڈنگ کا خطرہ بڑھ گیا ہے ۔

ریسکیو 1122 کنٹرول روم میں ڈسٹرکٹ مری کی طرف سے جاری ہدایت نامہ میں کہا گیا ہے کہ دوران سفر تیز رفتاری سے اجتناب کیا جائے ،فوگ لائٹس کا استعمال کیا جائے ،خاص طور پر شدید دھند میں گاڑی کے انڈیکیٹر اور اشارے آن رکھیں اور محفوظ جگہ پر پارک کریں ۔ریسکیو 1122 کنٹرول روم میں ڈسٹرکٹ مری کے کسی بھی علاقے سے موصول ہونے والی ایمرجنسی کال پر بروقت ریسکیو سروس کی فراہمی اوالین ترجیح ہے ۔

ملکہ کوہسار مری میں برف باری کےباعث مختلف علاقوں سے سیاحوں نے مری کا رخ کر لیا ہے ، مری حکام کا کہنا ہے کہ پنجاب اور دیگر صوبوں سے آنے والے سیاحوں کیلئے ضروری ہے کہ وہ گرم کپڑے ساتھ لے کر آئیں اور گاڑیوں کے ساتھ چین ضرور رکھیں تاکہ روڈ پر ٹریفک کی روانی میں کسی قسم کی دشواری سے بچا جا سکے ۔