آرمی چیف کی اقوام متحدہ کے سیکرٹری جنرل انتونیو گوتریس سے ملاقات

آرمی چیف جنرل سید عاصم منیر کی اقوام متحدہ کے سیکرٹری جنرل انتونیو گوتریس سے نیو یارک میں ملاقات ہوئی ۔ پاک فوج کے سربراہ جنرل سید عاصم منیر نے کہا ہے کہ اقوام متحدہ کی سلامتی کونسل کی قراردادوں اور کشمیری عوام کی خواہشات کے مطابق دیرینہ مسئلہ کشمیر کے پُرامن حل تک جنوبی ایشیاء میں قیام امن کا خواب شرمندہ تعبیر نہیں ہوگا۔

آرمی چیف نے جموں و کشمیر کی حیثیت تبدیل کرنے کی بھارتی یکطرفہ اور غیر قانونی کوششوں کی مذمت کی اور کہاکہ یہ اقدامات اقوام متحدہ کی سلامتی کونسل کی قراردادوں کی خلاف ورزی ہیں۔

جنرل عاصم منیر نے مسئلہ فلسطین کے بارے میں پاکستان کا موقف دہرایا اور سیکرٹری جنرل پر زور دیا کہ وہ غزہ میں جاری وحشیانہ اسرائیلی مظالم اور دہشت گردی کے فوری خاتمے کیلئے بین الاقوامی برادری کو متحرک کریں تاکہ انسانی بحران کو روکا جا سکے۔

انہوں نے خصوصاً بے گناہ شہریوں کشمیریوں  کی حالت ِ زار پر گہری تشویش ظاہر کی جنہیں بے دردی سے نشانہ بنایا جا رہا ہے۔

اقوام متحدہ کے سیکرٹری جنرل نے ان تحفظات کو تسلیم کیا اور ادارے کے صدر دفتر کا دورہ کرنے پر جنرل سید عاصم منیر کا شکریہ ادا کیا۔

آرمی چیف نے اقوام متحدہ کی تمام سنجیدہ کوششوں پر پاکستان کی طرف سے مسلسل حمایت کا اعادہ کیا۔