ملک بھر میں گیس کا بحران شدت اختیار کرگیا ،عوام بلبلا اٹھے

ملک بھر میں سردی کی شدت میں اضافے کے ساتھ ہی گیس ناپید ہوگئی ہے، سخت موسم میں عوام کہیں سرے سے گیس غائب ہونے اور کہیں پریشر میں کمی کے باعث بلبلا اٹھے ہیں۔

شہریوں کا شکوہ ہے کہ حکومت نے 3 وقت گیس دینے کا وعدہ کیا تھا، یہاں تو ایک وقت بھی میسر نہیں ہیں، مہنگائی کے بوجھ تلے دبے عوام کے صبر کا پیمانہ لبریز ہورہا ہے۔

ادھر کراچی، لاہور، اسلام آباد، راولپنڈی، کوئٹہ، پشاور، ملتان اور حیدر آباد سمیت ملک بھر میں گیس کا بحران مزید شدید ہوگیا، جو گیس 24 گھنٹوں میں کچھ دیر کیلئے آتی تھی اب وہ بھی آنا بند ہو گئی۔

لکڑیوں اور گیس سلنڈر کی قیمتیں آسمان پر چلی گئی ہیں، لائنوں میں لگ کر لوگ سلنڈر بھروانے پر مجبور ہیں۔

سردی میں اضافہ ہوتے ہی ملک بھر میں گیس بحران شدت اختیار کر گیا#GNN #GNN_Updates #BreakingNews #NewsUpdates pic.twitter.com/PZ0MwoluUi

— GNN (@gnnhdofficial) December 16, 2023

ملک کے مختلف شہروں میں گیس بحران کے باعث ہوٹل مالکان نے بھی گیس پریشر میں کمی کے باعث ایل پی جی سلنڈر کا استعمال شروع کردیا ہے۔

شہریوں کا کہنا ہے کہ بچوں کا تین وقت کا کھانا پورا کریں یا لکڑی خریدیں ، انہوں نے کہا کہ سردیوں میں گیس کی ہمیشہ سے یہی صورت حال ہے حکومت کو چاہیے کہ اس کو کوئی مستقل حل کیا جائے ۔