بانی چیئرمین پی ٹی آئی کا فرد جرم سمیت سائفر کیس کی کارروائی اسلام آباد ہائیکورٹ میں چیلنج

سابق چیئرمین پی ٹی آئی عمران خان نے فرد جرم سمیت سائفر کیس کی کارروائی کو اسلام آباد ہائیکورٹ میں چیلنج کرتے ہوئے اب تک کارروائی کو کالعدم قراردے کر بری کرنے کی استدعا کردی۔

بانی پی ٹی آئی عمران کان کی جانب سے دائر درخواست میں مؤقف اپنایا گیا کہ 23 نومبر سے اب تک کی کارروائی غیرقانونی ہے۔

درخواست میں کہا گیا کہ 12دسمبر کو ٹرائل کورٹ نے سائفر کیس کے خلاف ہماری درخواست مسترد کی، ٹرائل کورٹ کے جج نے آفیشل سیکرٹ ایکٹ کی دفعہ 13 (2)(3) میں لفظ شکایت کی درست تشریح نہیں کی۔ قانون میں لفظ شکایت کی تشریح واضح ہے، جس میں پولیس افسر کی رپورٹ کا ذکر نہیں، کریمنل پروسیجر کی دفعہ 4 (ایچ) میں بھی لفظ شکایت کو واضح کیا گیاہے۔

درخواست کے متن میں کہا گیا کہ قانون کے مطابق شکایات کا مطلب کسی الزام پر مجسٹریٹ کے روبرو زبانی یا تحریری استدعا ہے۔ چیئرمین پی ٹی آئی کے خلاف زیر سماعت سائفر کیس، ایف آئی آر اور پولیس رپورٹ کی بنیاد پر چلایا جارہا ہے۔

درخواست میں کہا گیا کہ آفیشل سیکرٹ ایکٹ ایک اسپیشل قانون ہے جو عام قانون سے مختلف ہے، اسپیشل لا ہونے کی وجہ سے آفیشل سیکرٹ ایکٹ کا اطلاق کرتے ہوئے قانونی طریقہ کار کو اپنانا ضروری ہے۔