حزب اللہ کے شام اور عراق میں امریکی اڈوں پر حملے، اسرائیل پرگولہ باری

غزہ پر اسرائیلی جنگ نے لبنان کی سرحد کو بھی اپنی لپیٹ میں لے لیا، شام اور عراق میں امریکی افواج پر مسلح دھڑوں کی طرف سے دوبارہ حملے ہوئے ہیں۔

غیر ملکی خبر رساں ایجنسی کے مطابق حزب اللہ نے اعلان کیا کہ اس نے ایک اسرائیلی سائٹ پر میزائلوں سے بمباری کی ہےاور لبنان کی سرحد پر واقع بارانیت کے جنگلات پر آگ لگانے والے گولے فائر کیے۔ حزب اللہ کا کہنا ہے کہ وہ لبنانی دیہاتوں کو نشانہ بنانے کے اسرائیلی حملوں پرخاموش نہیں رہے گے اور دشمن کو جواب دیا جائے گا۔

سیریئن آبزرویٹری فار ہیومن رائٹس نے بدھ کو اطلاع دی تھی کہ اسرائیل نے ملک کے جنوب مغرب میں قنیطرہ کے دیہی علاقوں میں عرنا اور حضر کے دیہات کے ارد گرد شامی فوج کے ٹھکانوں پر دھماکہ خیز میزائلوں سے بمباری کی۔ انہوں نے مزید کہا کہ یہ کارروائی شام کی طرف سے مقبوضہ گولان کی طرف 4 میزائل داغے جانے کے جواب میں کی گئی ہے۔

آبزرویٹری کا کہنا ہے کہ دو میزائل گرنے کے نتیجے میں دیر الزور دیہی علاقوں میں کونیکو فیلڈ میں امریکی اڈے کے علاقے میں دو پرتشدد دھماکوں کی آوازیں سنی گئیں۔ تاہم کسی انسانی جانی نقصان کے بارے میں کوئی اطلاع موصول نہیں ہوئی۔غزہ جنگ میں اسرائیل کی امریکی حمایت کے نتیجے میں شامی علاقے میں امریکی اڈوں پر مسلح دھڑوں نے 19 اکتوبر سے 60 حملے کیے ہیں۔

اسی طرح کے ایک حملے میں، امریکی سینٹرل کمانڈ نے جمعرات کو اعلان کیا کہ بدھ کو عراق میں الاسد ایئر بیس پر ایک میزائل داغا گیا، جہاں امریکی افواج تعینات ہیں تاہم اس میں کوئی جانی نقصان نہیں ہوا ہے۔